“MadCup” ən səviyyəli turnirlərdən biridi. Bizim ora getməyimiz özü bir nəticədi. Aşağı yaş qruplarının ən yaxşı turnirini axtarırdıq. Avropadakı komandaların səviyyəsini görmək istəyirdik. “MadCup” turnirinə qoşulmaq yolunda təşkilatçılığımız 15-20 gün çəkdi. İştirakla bağlı sorğu göndərdik, təşkilatçılar klubumuzla maraqlandılar. Müəyyən bir vaxt keçəndən sonra akademiyamızı turnirə dəvət etdilər. Turnirdə 10-19 yaşa kimi həm oğlanlar, həm də qızlar var idi, ümumilikdə 807 komanda iştirak edirdi. Ölkə sayı həddən artıq çox idi. Orta hesabla 60-70 stadionda turnir keçirilirdi. Eyni oteldə 6-7 ölkənin komandaları yerləşirdi. Təşkilatçılıq çox yüksək səviyyədə idi. Bir dəfə də Avstriyanın Vyana şəhərində olmuşdum. Amma orda bu qədər geniş miqyaslı keçirilməmişdi. Turnirdə hüquq-mühafizə orqanları da işə qarışmışdı. Yol xəritəsinə kimi verilmişdi. Açılış mərasimi Madridin “Vanda Metropolitano” stadionunda oldu. Bütün komandalar tək-tək təqdim olundu. Açılışdan öncə akademiyanın əlaqələndiriciləri ilə görüşdük, bizə 2 saata yaxın seminar keçdilər. Açılış mərasimində 2-3 futbolçu və “Atletiko”nun prezidenti iştirak etdi. İnanmıram ki, indiyə kimi hansısa Azərbaycan komandası belə turnirə qatılsın. Biz oyundan-oyuna, məşqdən-məşqə uşaqlara nəsə öyrətməyə çalışırıq. İspaniyaya getməmiş uşaqlara təməli öyrədir, taktiki düzülüşləri tətbiq edirdik. Bir çox ölkənin komandasına qarşı oynadıq. Orta hesabla 5 gün ərzində 9 oyun keçirdik. Futbol baxımından geri qalmadıq. Həmişə Avropaya gedəndə istəyirik ki, nəticə qazanaq. Madrid “Atletiko”suna 2:8 məğlub olduq. Uşaqlar çox həyəcanlanmışdılar. Buna baxmayaraq, yaxşı oyun nümayiş etdirdik. Rəqibin sürətli qərarlar verməsi bizi çox heyrətləndirirdi. Bəlkə də bizim 17-18 yaş qrupundan olan futbolçularımız heç belə sürətli qərar verə bilməz. Bizim qrupda çox yaxşı komandalar var idi. “Bürünc Liqa”da yalnız finalda məğlub olduq. Deməzdim ki, biz onlardan zəif idik. Sadəcə, uşaqlar həm bir qədər həm yorulmuşdular, həm də hesabı açdığımıza görə arxayınlaşdılar. Biz də “Bürünc Liqa”nın qalibi ola bilərdik”.