Messi gələn il karyerasını bitirəcək?
“İnter Mayami”nin və Argentina yığmasının 36 yaşlı hücumçusu Lionel Messi ESPN telekanalına müsahibədə bir daha komanda dəyişməyəcəyini etiraf edib:
“İnter” sonuncu klubumdu. Futbol oynamağı xoşlayıram və indi bu iş daha çox xoşuma gəlir. Ona görə ki, daha az vaxtımın qaldığını dərk edirəm”.
Maraqlıdı ki, Messi elə həmin müsahibədə karyerasını bitirməyə hazır olmadığını da deyib.
İndi isə bu açıqlamaya dərindən baxaq. Leonun “Mayami” ilə müqaviləsinin müddəti 2025-ci ilin dekabrında bitəcək. Həmin vaxt onun 38 yaşı tamam olacaq. Hər şey argentinalının dediyi kimidisə, onda möhtəşəm hücumçunun bir ildən sonra karyerasını bitirməməsi üçün bir yol var – Amerika klubu ilə müqavilə müddətini uzatmalıdı. Hələ ki Messinin yeni müqavilə imzalayıb-imzalamayacağı bilinmir.
Leonun 2026-cı ildə üç ölkədə keçiriləcək dünya çempionatında iştirak edib-etməyəcəyi də bilinmir. Messi yaxınlarda “Infobae” nəşrinə müsahibədə bu mövzuya toxunub:
“Bu mənim fiziki durumumdan və rəqabət aparmaq, komanda yoldaşlarıma yardım etmək imkanımdan asılı olacaq. Hələ vaxt var, o vaxta qədər özümü necə hiss edəcəyimi bilmirəm”.
Onu da əlavə edək ki, DÇ-2026-da iştirak Leonu rekordçu edəcək – indiyə qədər hələ heç bir futbolçu altı mundialda iştirak etməyib.
Bəs Messi indi hansı formadadı? Dünya ulduzu bir neçə gündən sonra Amerikada start götürəcək, Argentinanın favoritlərdən sayıldığı Amerika Kubokunda çıxış etməyə hazırlaşır. Artıq iyunun 20-də “albiselesta” Peru yığması ilə oyuna çıxmalıdı.
Hələ ki Leo karyerasını tezliklə bitirməklə bağlı hansısa əlamət sezdirmir. “İnter Mayami”nin lideri MLS-in 2024 mövsümündə meydana çıxdığı 12 oyunda 12 qol vurub, 10 məhsuldar ötürmə verib. Argentinalının komandası 35 xalla Şərq konfrasında liderdi və tarixində ilk dəfə ölkə çempionu ola bilər.
Bəs onun karyerasını bitirməklə bağlı hansısa başqa variantlar varmı? Messi dəfələrlə karyerasını futbol təhsili almağa başladığı “Barselona”da bitirməyi arzuladığını deyib. Argentinalı PSJ-dən gedəndən sonra azad agentə çevrildiyi 2023-cü ilin yayında İspaniya klubuna dönə bilərdi, ancaq “göy-qırmızılar” maliyyə çətinliyi üzündən argentinalı ilə müqavilə imzalaya bilmədi. Leo onda belə demişdi:
“Eşitmişəm ki, “Barselona” mənim dönüşüm naminə adamların işdən çıxarılmasına, futbolçuların satışına və maaşların aşağı salınmasına qədər ən müxtəlif prosedurlardan keçməlidi. Düzünə qalsa, bütün bunları yaşamaq istəmirəm”.
Messinin karyerasını bitirməklə bağlı digər variant onun doğma klubuna – Rosario “Nyuells Old Boyz”una dönüşü olrdı. Ancaq Leonun yeni sözləri ona işarədi ki, həmin transferə ümid etməyə dəyməz.
Yeri gəlmişkən, Messi dünya və Avropa çempionatlarındakı rəqabətin səviyyəsini də müqayisə edib. Xatırladaq ki, “Real”ın forvardı Kilian Mbappe bir neçə gün əvvəl bildirmişdi ki, Avropa çempionatı onun üçün ən mürəkkəb turnirdi:
“Çoxları deyir ki, Avropa çempionatı ən mürəkkəb turnirdi. Bəs Argentina, Braziliya, Uruqvay necə olsun? Nəyə görəsə hər kəs dünya çempionu olmağı arzulayır, Avropa çempionu olmağı yox”.
Xatırladaq ki, Argentina yığması Qətərdə keçirilən dünya çempionatının finalında məhz Fransanı məğlub etməyi bacarıb (3:3, p. – 4:2).
Digər xəbərlər
