İyunun 5-6-də dünyada milli komanda səviyyəli növbəti oyunların həyəcanı yaşandı.

Qitə çempionatına və Amerika Kubokuna (AK) hazırlaşan yığmalar gücünü yoldaşlıq görüşlərində sınadılar.

AÇ-2024-ün favoritlərindən sayılan Fransa Lüksemburq ilə matçda hesabı fasilə ərəfəsində açsa da, ikinci hissədə daha iki qol vuraraq böyükhesablı qələbə qazandı. İlk iki qolun ötürməsini verən Mbappe oyunda son nöqtəni özü qoydu. O, milli formadakı 78-ci oyununda 47-ci qolunu vurdu. Hücumçu qapıya yol tapandan sonra köynəyini qaldıraraq ötən həftə dünyasını dəyişən, adını “Aleks dayı” kimi yazdığı yaxınının şəklini nümayiş etdirdi və onun xatirəsini yad etdi.

Gözlənildiyi kimi, İspaniya Andorraya böyük hesabla qalib gəldi. Luis de la Fuentenin komandası zəif rəqibinin qapısına ilk hissədə yalnız bir dəfə yol tapdı. Amma pireneylilər fasilədən sonra “çırtdanlar”ın qapısını topa tutdular. İkinci hissədə meydana çıxan Oyarsabalın het-triki və Ferran Torresin qolu İspaniyanın 5:0 hesablı qələbəsini təmin etdi. Peresin hesabı açmasına şərait yaradan Kubarsi milli komandanın tarixinə məhsuldar ötürmə edən ikinci ən yeniyetmə oyunçu kimi düşdü. İyunun 5-də 17 yaş 135 günlüyündə olan “Barselona”nın müdafiəçisi bu planda yalnız həmklubu Yamaldan (16 yaş 257 gün) geri qalır.

Belçika evdə Monteneqronu 2:0 hesabıyla məğlub etdi. Hesabı fasilə ərəfəsində De Bruyne açdı. Maraqlıdı ki, ikinci qolu məhz Kevini əvəzləyən Trossar vurdu.

Niderland öz meydanında AK-ya hazırlaşan Kanadanı 4:0 hesabıyla darmadağın etdi. Rotterdamda keçirilən matçın qəhrəmanı hesabı açan Depaya məhsuldar ötürmə edən və az sonra özü də qol vuran Frimponq oldu. İyunun 20-də ABŞ-də start götürəcək AK-nın iki iştirakçısı arasındakı matç da tərəflərdən birinin 4:0 hesablı qələbəsi ilə nəticələndi. Maraqlıdı ki, Uruqvayın Meksikanı məğlub etməsində het-trik ilə rol oynayan Nunyes “Liverpul”un formasında meydana çıxdığı son 10 oyunda qapıya yol tapa bilməmişdi.