“Qarabağ” – “Zirə” oyununu izləmək üçün stadiona çatanda saat 19.00 idi.

Tribunalara artıq yetərincə adam toplaşmışdı. Amma hələ boş yerlərin qalması “stadionda anşlaq olacaq” proqnozu ilə tərs-mütənasib gəlirdi. Yenə də oyunun başlamasına 1 saat qaldığını düşünərək, bunun üzərində çox dayanmadıq.

Hər iki komandanın azarkeşləri kubokun finalına hazırlıqlı gəlmişdi. Stadionun üzbəüz tribunalarında xüsusi pankartlar da açıldı. “İmarət Tayfa” üzərində Allahverdi Bağırovun şəklinin yer aldığı, klubun tarixi emblemi olan bayraqlar yelləyirdi. “Qarabağ Hooligans” və “Qarabağ Ordu” azarkeş qrupları isə yanaşı dayanmışdı.

Xalq artisti Aygün Kazımova öncədən planlaşdırıldığı kimi meydanı yarımsaatlıq ələ aldı. Bu arada futbolçuları matça hazırlaşırdı. Onların arasında isə baş hakim Rəvan Həmzəzadə köməkçiləri ilə isinmə hərəkətləri edirdi. Proqrama uyğun olaraq, ardınca aparıcı Sənan Şəfizadə ötən il ölkə kuboku “Qəbələ” ilə qazanan Elmar Baxşıyevi kubokla meydanın mərkəzinə dəvət etdi. Daha sonra 2006-cı ildən “Qarabağ”ın formasını geyən 34 yaşlı kapitan Maksim Medvedevə karyerasını başa vurması münasibəti ilə “552” nömrəli forma təqdim olundu. “İmarət Tayfa” “Qarabağ”ın qüruru Maksim Medvedev” şüarını səsləndirdi.

Komandalar meydana daxil olmamış könüllülərin əlində tutduğu xüsusi hazırlanmış “Azərbaycan kuboku”, “Qarabağ” və “Zirə” bayraqları meydana sərildi. Nəhayət, 3-4 dəqiqə gecikmə ilə hər iki komandanın futbolçuları meydana təşrif buyurdu.

Rəşad Sadıqov kostyum geysə də, Qurban Qurbanov sadə geyimdə idi. Oyun başlayanda “Zirə”nin azarkeşləri böyük ölçülü qartal şəkli açdılar. Tribunalarda “Qarabağ”a dəstək verənlər, həmçinin onun formasını geyənlər çoxluq təşkil edirdi. Sadıqov oyunun gedişində adəti üzrə hakimlərə emosianal reaksiya verirdi. Hətta 42-ci dəqiqədə Juninyo qol vurandan sonra Sadıqov özünü saxlaya bilməyib ona nəsə dedi, braziliyalı isə problem böyüməsin deyə özünü razılaşmış kimi göstərdi. Qolun qeydə alındığını görən baş məşqçi narazılığını köməkçi hakimə bildirməkdən də çəkinmədi.

İkinci hissədə “qartallar”ın azarkeşlərin sayında azalma gözümüzdən qaçmadı. 57-ci dəqiqədə “Zirə”nin bərabərlik qolunu vuran İsmayıl İbrahimli ağdamlıların oyunçusu olduğundan qol sevincini bəlli etmədi. Hətta əli ilə “qartallar”dan sakit qalmağı xahiş etdi.

Mükafatlandırmaya hazırlıq vaxtı külək prosesin ləngiməsinə səbəb oldu. Kubokun medalları təqdim edilərkən futbolçular övladları ilə gəldilər. Mərasimdə AFFA-nın prezidenti Rövşən Nəcəf, vitse-prezident Sərxan Hacıyev, PFL-in vitse prezidenti Elgiz Abbasov və digər rəsmilər iştirak edirdi. Yeri gəlmişkən, PFL-in ağır qəza keçirən vitse-prezidenti Aslan Şahgərdiyev də stadiona gəlmişdi.Mükafatlarını alan “Qarabağ” futbolçuları sevincini “İmarət Tayfa” ilə bölüşdü. Maksium Medvedevlə Abbas Hüseynov “Qarabağ Ordu “ və “Qarabağ Hooligans”ın qarşısında kuboku qaldırsalar da, onlar ayağa qalxmadı. Həmçinin saymazyanalığa görə futbolçulara narazılıqlarını bildirdilər. “Qarabağ”ın rusiyalı qapıçısı Andrey Lunyov ailə üzvləri ilə birgə vətəninə yola düşmək üçün hava limanına tələsirdi...

RÖYANƏ OĞUZ