Futbol üzrə ölkə çempionatlarında mövsüm başa çatdı.

Şənbə və bazar günləri keçirilən oyunlarla Misli premyer-liqasıyla müvəqqəti sağollaşdıq. 1-ci liqanın sonuncu turunun matçlarına isə dünən şahidlik etdik. Əvəzedicilər liqasında “Neftçi-2” çempion oldusa, 2-ci liqanın ən güclüsü “Baku Sportinq”di. Region Liqasına gəlincə, mayın 24-ü bu turnir də “istirahətə yollandı”. Ümumi nəticələrə, yəni qeyd olunan çempionatların turnir cədvəlinə nəzər salanda işlərin “yağ kimi” irəlilədiyi görünür. İstər komandaların topladığı xal, istərsə də top fərqi, qələbə, məğlubiyyət, heç-heçə statistikaları ürəkaçandı. Qısası, rəqəmlər istənilən liqada xüsusilə ilk “beşlik”də ciddi rəqabətin olduğundan xəbər verir. Lakin bu işlərin bir “əmma”sı var. Sözümün canına keçid alaq...
Ötən həftə elitada üç həlledici matça şahidlik etdik. “Sabah” – “Sumqayıt” (2:0) və “Səbail” – “Neftçi” (0:3) oyunlarında əcnəbi və yerli hakimlər iş başında oldusa, “Kəpəz” – “Zirə” (0:1) görüşündə Rəvan Həmzəzadə və briqadası ədaləti təmsil etdi. İş orasındadı ki, Tovuzda keçirilən qarşılaşmada “qartallar”ın vurduğu qol qaydalara uyğun deyil! Həmin hücumun başlanğıcında topun Rəhimin əlinə dəydiyinə şübhə yoxdu! Belədə Rəşad Sadıqovun komandası bir xal qazanmalı və hazırda 3-cü yox, 5-ci pillədə qərarlaşmalıydı. Mövsüm ərzində dəfələrlə hakimlərdən narazılıq edən Rəşad bəy budəfəki idarəçilikdən haqsız qazanc əldə etdi. Bu öz yerində...
1-ci liqanın 25-ci turunun “İmişli” – “Qaradağ Lökbatan” matçını xatırlayaq. Həmin oyunda nələrin baş verdiyini detallarına qədər yazmışdıq. Xatırladaq ki, meydan sahiblərinin futbolçusu Ruslan Hacıyev 41-ci dəqiqədə hesabı açsa da, baş hakim İnqilab Məmmədov topun onun əlinə dəydiyini düşünərək qolu qeydə almadı. Halbuki futbolçu topu çiyniylə ram etmişdi! Beləliklə, mövsüm ərzində uğurlu çıxışla yadda qalan, çempionluğa iddialı komanda haqsız şəkildə xal itirdi. Nəticədə ilk iki pillə “Şamaxı” və “Qaradağ Lökbatan”ın sərəncamında qaldı. Bu da öz yerində...

Qeyd etdiyim kimi, 2-ci liqada çempion bəllidi. Lakin bu turnirin reqlamentinə əsasən mövsümü ikinci pillədə bitirən komanda 1-ci liqanın sondan ikincisiylə pley-off matçlarında üz-üzə gəlir. Məhz bu oyunlarda qarşılaşacaq komandalar mayın 20-də bəlli oldu. “Cəbrayıl” 26-cı turda evdə “Füzuli”ni məğlub edərək “Difai Ağsu”yla görüşmək şansı qazandı. Əla? Yox, rəzillik... İndi də “Füzuli”nin baş məşqçisi Nadir Əliyev oyunda VAR sisteminin olmamasından gileylənir. Çünki yüzfaizlik penaltilərinin verilmədiyini iddia edir.

Ümumiyyətlə, belə əhəmiyyətli oyunlardan sonra müəyyən söz-söhbətin yaranacağını təxmin etmək çətin deyildi. Futbolumuzun ümumi səviyyəsi, hələ indi-indi hansısa ciddi islahatlar üçün planlar qurulduğu nəzərə alınmalıydı. Ən azı hər ciddi matç üçün minimum tədbirlər görülməliydi! İnkişafa nail olmaq istəyiriksə, vaxtdan və maliyyədən başqa nəyisə qurban vermək olmaz. Axı bu teoremi yadda saxlamaq elə də çətin deyil: başqasının bədbəxtliyi üzərində xoşbəxtlik qurmaq olmaz!

Göründüyü kimi, inkişafın qurbanları ortadadı. Bu məqamda “Sabah” – “Sumqayıt” matçını əhatə edən mətbuat konfrasında baş verən hadisə yadıma düşdü. Daha dəqiqi, rəsmi hissə bitəndən sonra Krunoslav Renduliçin qaşqabaqlı halda qurduğu cümlələr: “Mən də çox şey danışa bilərəm. “Sumqayıt”ın xeyrinə verilən haqsız penaltilərdən danışırammı? Məğlubiyyəti qəbul etmək lazımdı. Gəlib təbrik edib, əl sıxmaq lazımdı”.
Bəli, xorvatiyalı Samir Abasova uzatdığı əlin geri çevrilməsinə belə reaksiya verdi. Bəlkə də “Sumqayıt”ın məğlubiyyətindən sonra yuxarıda qeyd etdiyim teoremi xatırlamışdı...

KƏNAN BAHADIR