Bilindiyi kimi “Bakı Sportinq” mayın 14-də 2-ci liqada çempionluğu təmin etdi.

Belə ki, xal sayını 61-ə çatdıran bakılılar ən yaxın rəqibi “Füzuli”ni 5 xal qabaqlayır. Belədə 26-cı turun nəticəsindən aslı olmayaraq, “Bakı Sportinq”  növbəti mövsümdən mübarizəni birinci liqada davam etdirəcək.
Maraq üçün bildirək ki, Bakı klubu cari mövsümdə biri texniki olmaqla iki dəfə məğlub olub. Uğurlu mövsüm keçirən komanda stadionla bağlı problemi də çoxdan həll edib. İnfrasktur baxımından sıxıntı olmayacağını indidən rahatlıqla demək olar.

Yeri gəlmişkən, mayın 21-də Binə qəsəbə stadionunda keçiriləcək “Şəfa” – “Baku Sportinq” oyunundan sonra 2-ci liqada qızıl, gümüş və bürünc mükafatçılar təltif olunacaq. Qalibə kubok təqdim ediləcək. Mövsümün bombardir və ya bombardirlərinin mükafatları veriləcək.
Bəs “Bakı Sportinq”un 1-ci liqa ilə bağlı hansı planları var? Bu haqda ətraflı məlumat almaq üçün komandanın baş məşqçisi Elman Sultanovla əlaqə saxladıq.

- Əvvəlcə çempionluq münasibətilə təbrik edirəm. Mövsümün əvvəlində çempion olacağınıza nə qədər inanırdız?
- Təşəkkür edirəm. Mövsümün əvvəlində heyəti formalaşdıranda ancaq çempionluq üçün yola çıxacağımızı futbolçulara demişdik. Təbii ki, inam var idi. İnam olmayan yerdə çalışmaq çox çətin olar.

 - “Bakı Sportinq”in oyun üslubu ilə maraqlanmaq istəyirik. Komandanız hansı üsluba söykənir?
- Oyunun əvvəlindən sonuna qədər biz diqtə etməliyik, top bizdə qalmalıdı. Təbii ki, bunu ikinci liqada tətbiq etmək olurdu.

- Komandanızdan yalnız Röyal Cəfərov bombardirlər siyahısında yer alıb.
- Nəcəfov komandamızın aparıcı futbolçusu, həm də kapitanıdı. Digər futbolçumuz Ülvi Quliyev də bir ara bombardirlər sırasında yer alırdı. Ancaq təəssüf ki, məşqlərin birində ayağının çıxması nəticəsində uzun müddət yaşıl meydandan kənarda qaldı.

- Deyilənə görə, klub hər oyunçuya çempionluq münasibəti ilə 1000 manat mükafat verib...
- Xeyr, bu informasiya doğru deyil. Təbii ki, oyunçular mükafat alacaq. Amma dediyiniz məbləği yox.

- Birinci liqa üçün heyətdə çox dəyişiklik görəcəyik? Ümumiyyətlə, komandada hansı dəyişikliklər nəzərdə tutulub?
- Heyətimiz dəyişəcək - bu mütləqdi. Birinci liqanın səviyyəsinə uyğun heyət quracağıq. Gündəmimizdə olan futbolçular var. Mövsüm bitəndən sonra onlarla danışıqlara başlayacağıq.

 - Bilindiyi kimi, “Qəbələ” birinci liqaya düşdü və  bir il sonra premyer-liqaya qayıtmaqda israrlıdı. Gələn il aşağı dəstədə mübarizənin daha da çətin olacağını düşünürsüz?
- Çox çətin mübarizə yaşanacaq. Biz bunun fərqindəyik. “Qəbələ”nin də birinci liqada olması, təbii ki, rəqabəti daha da artıracaq.

- Üstünlüklərinizdən biri də stadion probleminizin olmamamasıdı. Bəs sponsorla bağlı yenilik varmı, büdcə məsələləri necə tənzimlənir?
- Stadionumuz var və təbii ot örtüyünə malikdi. Sponsor məsələsi ilə bağlı sualı klub rəhbərliyinə ünvanlasaz, daha yaxşı olar. Mənim işim yaşıl meydandadı.

- Növbəti mövsüm üçün plan və ya hədəfləriniz nədi?
- Plan hazırdı. Hədəf yaxşı kollektiv formalaşdırmaq, 1-ci iqada çempion olub premyer-liqaya vəsiqə qazanmaqdı.

 - AFFA aşağı liqalar üçün istər büdcə, istərsə də digər lazimi imkanları yaradıbmı? Daha nə kim əlavələrin olmasını istərdiz?
- Düşünürəm ki, ikinci liqanın yaradılması çox yaxşı oldu. İlk ildə yaşanan rəqabəti özünüz gördüz. İlk mövsümdə çətinliklər yaşana bilərdi, bu normaldı. Gələcəkdə daha da yaxşı olacağını düşünürəm. Komanda sayı çox olarsa, əla olar.

RÖYANƏ OĞUZ