“Bilmədim tamaşadı, nədi” - Tural Qurbatov Elvin Nəsibovu təbrik etdi
Azərbaycan çempionatında mövsümün rekordu qeydə alınıb.
“Füzuli”nin futbolçusu Elvin Nəsibov bir oyunda 7 qol olub. O, 2-ci liqanın 25-ci turunda fərqlənib. Hücumçunun qolları “Kürmük Qax”la ev matçında komandasına 7:2 hesablı qələbə qazandırıb. Bu, mövsümün rekordu olsa da, ölkə çempionatları tarixində ilk belə hal deyil. Təkcə elə güclülər dəstəsində iki futbolçu bir oyunda 7 qol vurmağı bacarıb.
Hər iki oyunçu buna “Kəpəz” forması ilə nail olub. Fazil Pərvərov 1993/94 mövsümündə “Avtomobilçi” ilə görüşdə (8:0) yeddi dəfə fərqlənib. Üç il sonra – 1996/97 mövsümündə Rövşən Əhmədov “Şəmkir” üzərində 14:2 hesablı qələbədə qolların yarısını vurub.
Elvin Nəsibov septa-trik hesabına 2-ci liqanın bombardirləri siyahısında “Şahdağ Qusar”ın hücumçusu Tural Qurbatovu bir top geridə qoymağı bacarıb. Dünən Turalın həmkarının rekordu ilə bağlı fikirlərini öyrəndik: oyuna baxdınmı? Səni bombardirlər siyahısında qabaqlamaq üçün qurulan tamaşa deyildi ki? Son turda Elvin Nəsibovu qabaqlamaq şansın varmı? Bu sualları “Şahdağ Qusar”ın futbolçusu Tural Qurbatova ünvanladıq:
“Bəli, oyunu izləmişəm. Bilmədim tamaşadı, nədi. Öncə Elvin Nəsibovu təbrik edirəm. Çempionatın bitməsinə bir oyun qalıb. Elvin bombardir olsa, mən onu təbrik edəcəm. Yaxınımdı, dostumdu və bir yerdə oynamışıq. Başqa sözə ehtiyac yoxdu. Mən də bombardir olsam, Elvin məni təbrik edəcək. Əlavə olaraq, biz də istəyirik ki, Azərbaycan çempionatında belə hücumçular olsun”.
ƏSƏD SEYİDOV
Digər xəbərlər
