“Tottenhem”lə 34-cü turdan təxirə salınan oyunu təkcə “Mançester Siti”nin yox, “Arsenal”ın azarkeşləri də maraqla gözləyirdi.

“Football-plus.az” xəbər verir ki, məhz bu oyunda “Siti”nin mümkün xal itkisi “topçular”ın son tura da lider kimi daxil olmasına şərait yaradacaqdı. Ancaq... Artetanın və “Arsenal”ın ümidləri doğrulmadı.

Bu oyun ərəfəsində “Arsenal” turnir cədvəlinin zirvəsində qərarlaşdığından, təbii ki, “şəhərlilər” müəyyən təzyiq altındaydı. Çempionluq yarışında bütün ipləri öz əlində saxlamaq üçün “Siti” bu oyunda qalib gəlməliydi. Oyun heç də Qvardiolanın istədiyi kimi başlamadı. “Mahmızlar” topa daha çox nəzarət edirdi, müəyyən əsəbilik hiss olunurdu, hər iki qapı önündə təhlükəli vəziyyətlər yaranırdı. Ancaq 2-ci hissənin əvvəlində De Bruynenin ötürməsindən sonra Holann hesabı açdı. Lap sonda isə hesab arasındakı fərq artdı. Porronun Dokyuya qarşı kobudluğuna görə təyin olunan penaltini Holann qola çevirdi. “Mahmızlar”ın dəfələrlə fərqi azaltmaq imkanı olsa da, bundan yararlana bilmədilər. Deyəsən, “Tottenhem” azarkeşləri buna görə o qədər də məyus olmamışdılar. Axı onlar “Arsenal”ın çempion olmaması üçün MS-yə məğlubiyyətə də razı idilər. “Tottenhem”in artıq mövsümü 5-ci yerdə bitirəcəyi, deməli, ÇL-in növbəti mövsümündə olmayacağı da dəqiqləşdi.

34-cü turdan təxirə salınan oyunlar
Tottenhem – Mançester Siti 0:2
Holann, 51; 90+1-p.
Tottenhem: Vikario, Porro, Romero, Drequşin, Van de Ven, Bentankur (Kulusevski, 55), Heybyerq (Skipp, 85), Sarr (Lo Çelso, 85), Conson, Son Hın Min, Meddison (Mur, 90+3).
MS: Ederson (Orteqa, 69), Uoker, Akanci, Diaş, Qvardiol, Kovaçiç, Rodri, B.Silva, De Bruyne (Dokyu, 69), Foden, Holann (Alvares, 90+5).
Brayton – Çelsi 1:2
Uelbek, 90+8 - Palmer, 34. Nkunku, 64.
Mançester Yunayted – Nyukasl 3:2
Maynu, 31. Diallo, 57. Heylunn, 84 – Qordon, 49. Holl, 90+2.
1. Mançester Siti – 88, 2. Arsenal – 86... 5. Tottenhem – 63, 6. Çelsi – 60, 7-8. Nyukasl, Mançester Yunayted – 57... 10-11. Brayton, Bornmut – 48...
Bombardir: Holann (MS) – 27.

Faktlar
* “Aston Villa” gələn mövsüm Çempionlar Liqasında oynayacaq. Bu, “Tottenhem”in təxirə salınan oyunda MS-yə məğlubiyyətindən sonra dəqiqləşdi. “Mahmızlar” sona bir tur qalmış 4-cü pillədə qərarlaşan birmingemlilərdən artıq 5 xal geri qalır. Xatırladaq ki, “Aston Villa” qitənin ən nüfuzlu klub turnirində sonuncu dəfə 1982/83 mövsümündə oynayıb.
* De Bruyne premyer-liqada məhsuldar ötürmələrin sayına görə təmiz 2-ci pilləyə yüksəldi. MS-nin belçikalı xavbeki “Tottenhem”lə oyunda 112-ci belə ötürməsini verdi. Bu göstəricidə Fabreqası arxada qoyan De Bruyne indi yalnız Giqqzdən (162) geri qalır.
* MS ardıcıl 4-cü dəfə İngiltərə çempionu ola bilər. Son turda “Vest Hem” üzərində qələbə Qvardiolanın komandasını çempion edəcək. İngiltərə çempionatının 135 illik tarixində heç bir komanda titulu ardıcıl dörd dəfə qazana bilməyib. 5 halda klublar ardıcıl üç çempionluğu bayram edib. Buna “Haddersfild” 1924-26-cı, “Arsenal” 1933-35-ci, “Liverpul” 1982-84-cü və “Mançester Yunayted” 1999-2001-ci və 2007-09-cu illər aralığında nail olub.
* MS son 6 ildə ilk dəfə “Tottenhem”i səfərdə məğlub etdi. Londonda keçirilən əvvəlki 4 oyunda “şəhərlilər” “quru” hesablı məğlubiyyətlərlə (0:1, 0:1, 0:2, 0:2) üzləşmişdi. MS sonuncu dəfə 2018-ci ilin aprelində “Tottenhem”ə səfərdə qalib gəlmişdi (3:1).

Reaksiya
Pep Qvardiola, MS-nin baş məşqçisi: