“Futbol üçün darıxdığımı deməzdim. Karyeramla qürur duyuram. Amma bir il öncə qəbul etdiyim qərarı çox düşünəndən sonra verdim. Nə istədiyimi bilirdim. İndi ailəmlə birlikdə İstanbuldakı həyatın dadımı çıxarıram. İki övladımın böyüməsini görmək mənə zövq verir. Əslində karyeramı davam etdirmək üçün fürsətlərim var idi. Səudiyyə Ərəbistanı, Qətər və başqa ölkələrdən təkliflər almışdım. Amma davam etmək istəmədim və bu qərarıma görə də peşman deyiləm. Əvvəlki illərdə ailəmlə istədiyim qədər vaxt keçirə bilməmişdim. Ona görə də indi özümü onlara həsr edirəm. Başqa işlərim də var. Əmlak işi ilə məşğulam. Hobbilərimi də unutmuram. Stolüstü oyunlar oynamağı, hər gün idman zalına getməyi nəzərdə tuturam. Son hobbim isə atlara minməkdi. Bu, çox əyləncəlidi. Bu qədər idman zalına getməklə xüsusi bir hədəfim yoxdu. Bodibildinq dünyasından təklif gözləmirəm (gülür). Bunu, sadəcə, özüm üçün və formada qalmaq üçün edirəm. Evdə idman zalım var. Şəxsi məşqçi tutmuşam və hər gün bu şəkildə çalışıram. Kefim yaxşı olanda sabiq klublarımdan “Real”, “Arsenal” və “Fənər”in oyunlarına baxıram. Sonuncu dəfə “Real”ın “Siti”yə qarşı oyununu izlədim. “Siti” matçın böyük hissəsini üstün keçirdi. Amma “Real” ağıllı şəkildə müdafiə olundu. Rüdigerin sonuncu penaltisinin ardından “Hala Madrid” deyə yüksəkdən bağırdım. “Real”ın ÇL-i qazanacağına əminəm. Mənim oynadığım dönəmdə “El Klasiko” dünyanın bir nömrəli oyunu idi. Bizim bəxtsizliyimizdən həmin “Barsa” bəlkə də tarixinin ən güclü komandası idi. Qvardiolanın “Barsa”sı tam ayrı səviyyədə idi və indikindən çox fərqli idi. İndi insanlar “Liverpul” – “Mançester Siti” və ya premyer-liqanın başqa bir vacib oyununu daha üstün tutur. Təəssüf ki, “El Klasiko” əvvəlki nüfuzunu itirib. Amma “Real”ın burda heç bir günahı yoxdu. Çünki onlar hələ də dünyanın ən güclülərindən biridi. Problem “Barsa”dan qaynaqlanır. Çünki əvvəlki potensiallarından çox uzaqdılar. Qvaridola ilə Mourinyonun rəqabəti futbolun zirvə nöqtəsi idi. İndiyə qədər də bir çoxları o dönəm üçün darıxır. Gələcək haqda dəqiq bir söz deyə bilmərəm. Hələlik məşqçiliklə bağlı heç bir hədəfim yoxdu. İndiki durumumdan məmnunam. Bu cür həyatdan heç də sıxılmıram. Amma bir neçə ildən sonra nə olacağını deyə bilmərəm. Bu həftə “El Klasiko”nun favoriti, təbii ki, “Real”dı. Onlar qalib gəlsələr, yüz faiz çempion olacaqlar. Düzdü, “Barselona” da çarpışır, vuruşur. Bu mövsüm zədədən çox əziyyət çəkdilər. Həm də hakimlikdən çox şikayət edirlər. Bunun onlara faydası olmur. Bəzən özlərində də günah görməlidilər. Düzünü desəm, Benzema ayrılandan sonra “Real”ın yenə də yüksək səviyyədə qalması məni təəccübləndirdi. Arda Gülər “Fənər”də mənim üçün balaca qardaş kimi idi. Onu hər kəs yaxşı tanıyır. Ona görə də indi burda ona tərif yağdırmaq və üzərində əlavə təzyiq yaratmaq istəmirəm. Onun üçün yaranmış bu durumun öhdəsindən gəlmək asan deyil. Türkiyə kimi böyük bir ölkə gözünü ona dikib. Amma ona səbirli olmağı məsləhət görürəm. Əminəm ki, onun da bir gün zamanı gələcək. Hələ çox gəncdi. Məşqlərdə öyrənəcəyi çox şey var. Çünki dünya səviyyəli ulduzlarla birlikdə oynayır. Bəlkə də bu mövsüm və ya gələn mövsüm onun üçün özünü sübut etmək hələ tez olacaq. Amma isşlər qaydasında getməsə belə, Edeqor kimi örnəklər var. Onu da gənc yaşda oynaya bilməyəndə hər kəs tənqid edirdi. Amma bir neçə ildən sonra “Arsenal” kimi böyük klubun kapitanına və liderinə çevrildi”.