“Qarabağ” Misli Premyer-liqasının 31-ci turunda “Tofiq Bəhramov”da “Qəbələ” ilə heç-heçə etdi – 2:2.
Qonaqların kapitanı Asif Məmmədov oyundan sonra “Football-plus.az”a müsahibə verdi.
- Qələbəyə yaxın olsaz da, hesabınıza cəmi 1 xal yazdıra bildiz. Bu xal sizi ümidləndirdi?
- “Qarabağ”la oyunlarımız həmişə maraqlı keçir. Rəqibin gücü hamıya bəllidi. Həm də 1 xal hədiyyə kimi sevindirdi bizi. Hətta vacibliyindən çox, əhval-ruhiyyəmizin yerinə gəlməsinə təsiri oldu. 99 faiz elitadan düşmək üzrəyik. Bununla da barışmışıq.
– Deməli, 1-ci liqaya düşməyi artıq gözə almısız ...
– Aşağı liqa barədə fikirləşmirik. Hələ də öz oyunumuzu oynayırıq. Yalandan desəm ki, “Kəpəz”ə çatar, onu keçərik, bu da real görünmür axı. Reallığı demək lazımdı.
– Bəs AFFA İcraiyyə Komitəsinin komanda sayını artırmaqla bağlı qərar verəcəyinə ümidiniz varmı?
- Bəli, ümid ancaq onadı. Başqa çarə görünmür. Şansımız cəmi 1 faiz olar. Bir var 50-30 faiz olsun, bizdə o qədər yoxdu.
- Buna görə komandada ruh düşkünlüyü var?
- Yox, deməzdim. Çünki, hələ vacib oyunlarımız var. Hansı ki, çox şey bununla həll oluna bilər. Ona görə də ruhdan düşməyə haqqımız yoxdu. Hələ “Zirə” ilə kubok matçımız var.
– “Zirə” ilə oyun sizin üçün, demək olar, mövsümün ən vacib oyunu olacaq. Gözləntiniz nədi?
– Çempionatdan fərqli kubokda şansımız çoxdu. Həm də evdə oynayırıq. İstəyərik əlimizdən gələni edək ki, ən azı bu il nəyləsə yadda qalaq.
– Komandada ən təcrübəli futbolçulardansan. Kaxaber Sxadadzadənin gəlişi nəyi dəyişib
- Nə bilim... Hələ ki o barədə bir söz deyə bilmərəm. Necə idi, elə də davam edirik. Bundan əvvəl də daxili ab-hava necə idisə, o cürdü.
- Mövsümün sonunda yenə ötənilki kimi köklü dəyişiklik gözlənilir?
– Çempionatda qalsaq, yaxşı dəyişiklik lazımdı.
- Ötən oyundan sonra qapıçınız Kristof Atanqananın döyüldüyü deyilirdi. Buna aydınlıq gətirərdin. Elə bir hadisə olub?
- Yox, belə bir hadisə olmayıb. Kimsə sübut gətirirsə, mən həmin adamdan üzr istəməyə hazıram. Olmayan şeyi deyəndə adama təsir edir. Mənlə Samuel Tete arasında mübahisə olmuşdu, həqiqətən də təsdiqlədim. Atanqananin doyülməsi fakt deyil. Hə, paltardəyişmə otağında bir kapitan kimi iradimi bildirmişəm ki, bura gəlmisizsə, oynamalısız. Olmayan şeyi yazanda, deyəndə bizə də xoş gəlmir. Mən jurnalistlərə səslənirəm ki, əllərində olan sübutları yazsınlar.
RÖYANƏ OĞUZ