“Qarabağ” Misli premyer-liqasının 28-ci turunda “Kəpəz”i darmadağın etməklə 2023/24 mövsümünün çempionu oldu.

Bəs “köhlən atlar”ın belə erkən çempionluğunu şərtləndirən amillər hansılardı? Ölkə futbolunun tarixinə düşən hadisədə pay sahibləri kimlərdi? Ümumiyyətlə, bu çempionluğu “Qarabağ” üçün ciddi uğur saymaq məntiqəuyğundu? Detallara keçid alaq.

35-ci turun “Qarabağ” – “Turan Tovuz” matçından sonra qızıl medallar sahiblərinə təqdim ediləcək. Yəni Ağdam təmsilçisinin bu mükafatı haqq etdiyinə şübhəylə yanaşmaq qətiyyən doğru deyil. Komanda geridə qalan 29 oyunda yalnız üç məğlubiyyət alıb. 23 qələbə və 3 heç-heçə sayəsində qazanılan xallar çempion olmaq üçün yetərlidi. Hazırki mənzərədə pay sahibi olanların isə sayı-hesabı yoxdu.

Cari mövsümün əvvəlindən bəri, demək olar ki, futbol ictimaiyyətində hər kəs “Qarabağ”ın çempion olacağını deyirdi. Amma çoxu hadisələrin bu qədər erkən cərəyan edəcəyini təsəvvür etməmişdi. Axı “köhlən atlar”ı üç cəbhədə gərgin mübarizə gözləyirdi. Ağdam təmsilçisi yolun əvvəlində bir neçə dəfə büdrəsə də, toparlanmağı bacardı. Nəticədə Avropa Liqasının 1/8 finalına qədər irəliləməklə ilkə imza atdısa, kubokda da mübarizəni davam etdirə bildi. Hətta sıx qrafik komandanın premyer-liqada 17 oyunluq məğlubiyyətsizlik seriya əldə etməsinə belə mane olmadı. Bu ərəfədə büdcə, zəngin heyət və infrastruktur baxımından “Qarabağ”ın ən güclü rəqibləri ünvanına sahib olan “Sabah” və “Neftçi” isə problemlər içində üzürdü. Həm Ağdam təmsilçisinin bu komandalarla aradakı oyunlarda qalib gəlməsi, həm də adı çəkilən kollektivlərin başqa rəqiblərlə duellərdə çoxlu xal itirməsi fərqin artmasına səbəb oldu. Üstəlik “Sumqayıt”, “Zirə”, “Turan Tovuz” və “Səbail” kimi komandaların mövsüm ərzində keçmişə nisbətən uğurlu çıxışı hadisələrin axarını dəyişdi. Etiraf edək ki, bu dəfə aşkar favorit anlayışı məhz “Qarabağ” üçün keçərli oldu. Aşağı pillələrdə mübarizənin gərginləşməsi isə Ağdam təmsilçisinə sərf etdi. Belədə konkret sistemi, oyun tərzi və demək olar ki, hər cəhətdən rəqiblərini üstələyən futbolçuları olan “köhlən atlar” hadisələrin axarına tam nəzarəti ələ aldı. Qurban Qurbanov məcburi rotasiyalar etdiyi oyunlarda belə büdrəmədi. Ümumiyyətlə, “Qarabağ”ın uğurunun təməlində həm də rəqiblərinin kobud səhvləri dayanır.

“Köhlən atlar” cari mövsümdə Elvin Cəfərquliyev, Toral Bayramov və Bəhlul Mustafazadənin inkişaf prosesini, demək olar ki, tamamlamasına nail oldu. Nəriman Axundzadə karyerasında yeni dönəmə qədəm qoyub. Legionerlərə gəlincə, Juninyo hələ ki 17 qolla bombardirlər siyahısına liderlik edir. Onun son 8 oyunda meydana çıxması istisna deyil. Belədə daha çox qol vurması mümkündü ki, son mövsümlərin bombardirlərini qabaqlasın. Maraq üçün qeyd edək ki, 2013/14 mövsümündən bəri ən yüksək göstəricilər “Qarabağ”ın futbolçuları Reynaldo (2013/14) ilə Ramil Şeydayevə (2022/23) məxsusdu. Onlar hərəyə 22 qol vurub. Yəni Juninyo ölkə futbolu tarixinə azı son 10 ilin bombardiri kimi düşə bilər. Əlbəttə, bunun üçün ona daha 6 qol lazımdı.

Beləliklə, yuxarıda qeyd olunan sualların daha ətraflı cavabı üçün “Qarabağ”ın həm ölkə daxilindəki, həm də Avropa meydanlarındakı uğurlarını göz önünə gətirməli, həmçinin “danışan” rəqəmləri dinləmələyik. Hər şey sübut edir ki, heç nə təsadüf deyil. Yəni ağdamlılar gec-tez çempion olacaqdı. Bunun erkən baş verməsinin səbəbkarları klub rəhbərliyi, peşəkar baş məşqçi və keyfiyyətli futbolçulardı. Erkən çempionluğun günahkarları isə 3-cü pillədə qərarlaşan əzəli rəqib “Neftçi”dən tutmuş premyer-liqanı tərk etmək ərəfəsində olan “Qəbələ”yə qədər hər kəsdi. Buna görə “Qarabağ”ı qınayası deyilik ki... Uğur hər zaman alqışı haqq edir!

KƏNAN BAHADIR