"Football-plus.az" xəbər verir ki, oyundan sonra "qartallar"ın baş məşqçisi Rəşad Sadıqovun mətbuat konfransı keçirilib. Sizi onun fikirləri ilə tanış edirik:
"Maraqlı oyunun şahidi olduq. İkinci hissədə çox sürətli, baxımlı futbol getdi. Hesabda iki top fərqi ilə irəli çıxdıq. Bundan başqa hesabı daha da böyütməyə imkanımız var idi. Fürsətləri qaçırdıq. Sonda rəqib yarım epizod kimi bir vəziyyətdən qol vurdu. Futbolda belə şeylər olur. Son dəqiqələrdə qapı tirindən dönən topumuz var. Qələbə qazanmışıq. Üç həftə sonra bizi çox vacib cavab oyunu gözləyir. Amma hazırda bizi düşündürən "Qəbələ" ilə çempionat matçıdı".
- Nəticə sizi qane edir?
- Bu gün iki top fərqi ilə qələbə qazansaydıq da, mənim üçün dəyişən bir şey olmayacaqdı. Hətta bəlkə də cavab görüşü öncəsi daha çox narahatlıq keçirəcəkdim. Hər şey ikinci oyunda həll olunacaq. Futbolçular da başa düşürlər ki, boşalmaq olmaz.
- Araz Abdullayevin fiziki, psixoloji durumu necədi?
- Təbii ki, fiziki cəhətdən hazır deyil. Psixoloji cəhətdən isə yaxşıdı, həvəslidi. Uzun müddətdi oynamır. Amma gözlədiyimdən daha yaxşıdı. Bu gün də oyuna yaxşı qoşuldu. Fürsət düşdükcə ondan istifadə etməyə çalışacağıq.
- Meza Kolli və Araz Abdullayevi heyətinizə qatdız. Yenə hansısa təcrübəli oyunçunun gəlişi gözlənilir?
- Hazırda yox. Artıq axtarışlarımızı bitirmişik. Planımızda başqa futbolçu yoxdu.
- Sizin üçün kubok, yoxsa çempionatda ikinci yeri tutub Avropa Liqasına getmək daha önəmlidi?
- Çempionatda ikinci yeri tutmaq Avropa Liqasına vəsiqəni təmin etmir. "Qarabağ" - "Qəbələ" cütünün qalibi ilə finala "Qəbələ" çıxsa, ikinci yerlə Avroliqaya getmək olmur. Bizim özümüzün də finala çıxmağımız önəmlidi. Biz hər iki turnirə önəm veririk.
