Azərbaycan kubokunun 1/4 final mərhələsinə yekun vurulub.

"Neftçi" "Zirə"ni məğlub edib - 3:1. Oyundan sonra "qartallar"ın baş məşqçisi Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:

- Bu gün açıq futbol oynasaydız, nəticənin fərqli olacağını düşünmürsüz?
- İkinci hissədən etibarən açıq futbol oynadıq.

- Paltardəyişmə otağında Rəhimlə Keytanın arasında nə baş vermişdi?
- Bilmirəm, görməmişəm. Mən gələndə sakitlik idi, hamı oturmuşdu. Futbolçularla danışdım.

- Penaltini Rəhim Sadıxov vurmaq istəyirdi, amma Keyta vurdu. Rəhimi buna görə əvəzlədiz?
- Bəli. Rəhimi penaltiyə görə əvəzlədim. Bizdə iki penaltiçi var. Keyta və Rəhim. Birinci Keytadı. O, özünü inamlı hiss etmədikdə Rəhim vura bilər. Keyta topu götürüb vururdu. Aralarında bölüşə bilmədilər. Bu hal heç xoşuma gəlmədi. Pozitiv notlarda idim. Yaxşı mübarizə gedirdi, fərqlənə bilərdik. Amma o epizod məni məyus etdi.

- Keyta ikinci dəfədi penaltini qaçırır...
- Ola bilər. Bundan sonra da qaçıra bilər. Bizim penaltiçimiz Keytadı. Bir çox futbolçular qaçırır. Bu həssas məqamdı. Tez-tez dəyişmək olmaz. Mənə xoşdu ki, futbolçu səhv etdikdən sonra yenə özünə güvənir. Keyta penaltini öz əməyi ilə qazandı. Futboldu, belə şeylər olur.


- Rəhim Sadıxovu cəza gözləyir?
- Bu haqda düşənəcəm. İsti-isti fikir bildirib tələskən qərar vermək istəmirəm.

- "Neftçi" azarkeşləri sonda sizi xoş qarşıladı. Bu, gözlənilməz oldu?
- Çox xoş idi. "Neftçi" azarkeşləri karyeramda böyük rol oynayıblar. Böyük futboldakı ilk addımlarımı burda atmışam, burda püxtələşmişəm. O illərdə "Neftçi" azarkeşlərinin sevgisi və dəstəyi olub. "Neftçi" və "Qarabağ" azarkeşlərinin həyatımda xüsusi yeri var.

- Əsas favoritlərin kubokdan getdiyi məqamda mübarizəni dayandırdınız. Buna görə təəssüflənirsiz?
- Masa üzərində hansısa rəqib zəif görünür. Amma hər şey ola bilər. Üçüncü dəfədi ki, "Neftçi" ilə qarşılaşırdıq, iki dəfə biz keçmişdik. İki dəfə əvvəl keçdiyin komandanı sonra keçmək çətindi. Çünki rəqib motivasiya ilə çıxır. Futbolçular özlərinə və futbol camiəsinə nəsə göstərmək istəyirlər. "Neftçi" istəkli idi. Azərbaycan futbolu bu gün qazandı. Biz də qalib gələ bilərdik. İki il biz keçmişdik, bu il onlar keçdi. Önümüzə baxacağıq.

- Rəhim Sadıxov bu mövsüm fərqli mövqelərdə oyayıb. Bunun səbəbi nədi?
- Transfer etdikdə o mövqe üçün planlaşdırmırdım. Müəyyən itkilər, zədələr oldu. Ondan daha çox hücumçu kimi istifadə etdik. Bu gün solda başladı. İlk oyunla müqayisədə oyun planında heç nə dəyişməmişdi. Rəhim universal futbolçudu. Hücumçu transfer etmək istəyirəm. Zədəlilərimiz çox olur, hücumçusuz oynayırıq neçə matçdı. Meydana buraxmağa hücumçu yox idi. Rəhimə əsəbiləşdim. Ona görə onu Toni ilə əvəzlədim.