Hazırda bundesliqada çempionluq əmsalı cəmi 1,06-ya bərabərdi.

"Football-plus.az" xəbər verir ki, əvvəlki illər olsaydı, düşünmək olardı ki, söhbət yalnız “Bavariya”dan gedir. Amma bu mövsüm durum fərqlidi. Bukmekerlər bu əmsalı Münhen nəhənginin yox, sona 9 tur qalmış 10 xallıq fərqlə lider olan “Bayer-04”ün çempionluğuna verir! Komanda çempionluğu rəsmiləşdirən kimi 51 əmsal işə düşəcək. Məsələ burasındadı ki, mövsümün əvvəlində leverkuzenlilərin çempionluğuna məhz bu qədər əmsal verilirdi. Son 20 ilə nəzər salsaq, görərik ki, Avropada 5 dəfə çempionluğuna ən azı 51 əmsal verilən komandalar sonda sürpriz şəkildə qalib olub. Gəlin, onları xatırlayaq.

“Portu” (2003/04) – ÇL-də qələbəsi 51 əmsal
20 il öncə ÇL-in favoriti 4 əmsalla “Real” idi. Amma “qalaktikos” adlanan həmin komanda fiaskoya uğrayaraq La Liqada heç “3-lüy”ə də düşmədiyi halda, ÇL-də mübarizəni 1/4 finalda dayandırdı. Madrid nəhəngini sonradan finala qədər irəliləyən “Monako” mübarizədən kənarlaşdırdı. Təsəvvür edin, həmin mövsümün finalında çempionluğuna 51 əmsal verilən “Portu” ilə 67 əmsal verilən “Monako” üz-üzə gəldi. Yəni kimin qalib gəlməsindən asılı olmayaraq, final artıq tarixi idi. Joze Mourinyonun əsrarəngiz “Portu”su finalda 3 cavabsız qolla qalib gəldi. Həmin vaxtdan bəri ÇL-də bu cür qəribə final və bu cür sürpriz çempion olmayıb.

Yunanıstan (2004) – AÇ-də qələbəsi 101 əmsal
Maraqlıdı ki, “Portu” kimi bu hadisə də düz 20 il öncə baş vermişdi. Təsəvvür edin ki. AÇ-2004-də iştirak edən 16 yığmadan yalnız ikisinin çempionluq şansı Yunanıstanınkından daha az hesab olunurdu. Yunanların çempionluğuna 101 əmsal verilmişdisə, Bolqarıstana 188, Latviyaya 502 əmsal verilmişdi. Bu iki komanda ümumilikdə turniri 1 xalla tamamladı. Həmin xal latviyalıların almanlarla sürpriz şəkildə qolsuz bərabərə qalması sayəsində ortaya çıxdı. Yunanıstan nağılının nə ilə bitdiyini isə hər kəs bilir. Açılış oyununda meydan sahibi Portuqaliyanı məğlub edən, İspaniyanı qrupda saxlayan, 1/4 finalda son çempion statusunda olan Fransanı, yarımfinalda turnirin gizli favoritlərindən olan Çexiyanı mübarizədən kənarlaşdıran və nəhayət, finalda yenə Portuqaliyadan üstün olan Yunanıstanın bu zəfəri bütövlükdə futbol tarixinin ən böyük sürprizlərindən biri sayılır.

“Monpelye” (2011/12) – Liqa-1-də çempionluğu 81 əmsal
2011-in yayında Eden Azarlı “Lill” son çempion statusundaydı, “Marsel” və “Lion” yetərincə iddialı idi. Hələ heyətini ulduzlarla doldurmayan PSJ də kifayət qədər möhkəm komanda idi. “Monpelye”nin adı heç avrokuboklar uğrunda mübarizə aparacaq komandalar arasında da çəkilmirdi. Özü də əvvəlki mövsümü bu komanda düşmə zonasından yalnız 3 xal öndə - 14-cü pillədə başa vurmuşdu. Amma Rene Jirarın çalışdırdığı, heyətində Jiru, Belhanda, Kabella kimi istedadlı futbolçular olan “Monpelye” 2011/12-dəki performansı ilə hamını mat-məəttəl qoydu. Jiru həmin mövsümü 21 qol, 9 məhsuldar ötürmə, Belhanda 12 qol, 5 məhsuldar ötürmə ilə tamamladı. 29-cu turda liderliyi ələ keçirən komanda sona qədər də zirvəni əldən vermədi. Bu, “Monpelye”nin 105 illik tarixi ərzində ilk və yeganə çempionluğudu. Maraqlıdı ki, komanda həmin vaxtdan bəri heç bir mövsümdə 6-cı pillədən yuxarı qalxa bilməyib.

“Lester” (2015/16) – premyer-liqada çempionluğu 5001 əmsal
“Monpelye”nin zəfərindən bir neçə il sonra İngiltərə futbolunda ilk baxışdan yalnız nağıllarda baş verə biləcək bir olay yaşandı. “Lester” bundan cəmi bir il öncə premyer-liqaya qayıtmış və 2014/15-i 14-cü pillədə başa vurmuşdu. Ona görə də “tülkülər”in çempionluğuna ağlasığmaz rəqəm, yəni 5001 əmsal verildikdə bunu hər kəs normal qarşılamışdı. Maraqlıdı ki, cəmi 13 turdan sonra bu əmsal 100-ə, ilk dövrədən sonra isə 11-ə qədər endi! Heç kimin ciddi qəbul etmədiyi bu komandanın həmin mövsümdəki performansı ayrıca bir film mövzusudu və bəlkə də nə vaxtsa buna aid kino da çəkiləcək. Kante, Mahrez və Vardinin liderlik etdiyi, Klaudio Rabyerinin çalışdırıdığı həmin “Lester” sona iki tur qalmış çempion oldu! Təbii ki, bu uğurun davamı gəlmədi. İldən-ilə zəifləyən və əsas oyunçularını itirən “Lester” hazırda çempionşipdədi.

“Lill” (2020/21) – Liqa-1-də çempionluğu 51 əmsal
Həmin mövsüm pandemiya üzündən futbol dünyasında çətin keçdi. Fransada əvvəlki mövsüm yarımçıq dayandırılmışdı. “Lill” həmin vaxt 4-cü pillədə idi. 2020/21 ərəfəsində isə aşkar favorit PSJ idi. Maurisio Poçettinonun komandasının çempionluğuna yalnız 1,1 əmsal verilirdi. “Lill” 51 əmsalla siyahıda 4-cü pillədə idi. Bu komandanı “Lion” (26) və “Marsel” (31) də qabaqlayırdı. Amma Kristof Qaltyenin çalışdırdığı, müdafiədə təcrübəli Joze Fontenin, hücumda isə təcrübəli Burak Yılmazın liderlik etdiyi komanda mövsüm ərzində cəmi 3 dəfə uduzdu. Yekunda “Lill” Mbappeli, Neynarlı, İkardili, Di Mariyalı, Verrattili PSJ-ni 1 xal qabaqlayaraq sürpriz şəkildə çempion oldu. “Lill” növbəti mövsümə Superkuboku qazanmaqla başlasa da, uğurun davamı gəlmədi. Komanda mövsümü yalnız 10-cu pillədə başa vurdu.