"Ölkəmizdə ilk dəfə Avropa Liqasının 1/8 final oyunu keçirildi. Adamlar stadiona azı saatyarım tez gəlmişdi. Matç gec saatlarda bitsə də, hər kəs son dəqiqəyə kimi stadionda qaldı. Bu hallara ölkə idmanında, futbolunda tez-tez rast gəlinmir. Oyunda azarkeşlər çox yaxşı dəstək oldular. Amma müəyyən mənada ilk hissənin sonuna yaxın coşqu bir qədər azaldı. "İmarət tayfa" və "Qarabağ Ordu" dayanmadan lazımı dəstəyi göstərirdi. Təəssüf ki, bəzi sektorlardan onlara dəstək gəlmirdi. İnanmıram ki, "Qarabağ"ın ilk hissədə 2:0 öndə olacağını kimsə əvvəlcədən gözləyirdi. Bəlkə bəzi azarkeşlər də bu hesabın təsiri altındaydı. Sanki inanmırdılar. Yan sektorlardan fanklubların etdiyi coşquya istənilən qədər dəstək gəlmirdi. Bəzi adamlar, sadəcə, oyuna baxmağa gəlir. Tam çılğın dəstək göstərmək istəmirlər. Hər oyundan sonra sosial şəbəkələrdə çoxlu mesaj alıram. Bəziləri deyir ki, mən coşqu göstərdikdə yanımda oturan şəxs “mənə mane olursan, otur yerində, önümü kəsmə” deyir. Məncə, biz azarkeş olaraq, böyüməli, inkişaf etməliyik. Hər il "Qarabağ" sayəsində təcrübəmiz bir qədər də artır. Onlar güclü komandalar gətirir və biz inkişaf edirik. Sektorlara əlavə amiqolar qoyulmasına ehtiyac yoxdu. Bu fikirlə qəti razı deyiləm. Düşürəm ki, onda qarışıqlıq yaranacaq. Sadəcə, oyuna gələn azarkeşlər fərqinə varmalıdılar ki, mən də bu oyunda varam. Gələn azarkeş də fikirləşməlidi ki, mən də bu oyunun bir hissəsiyəm. Matçın gözəl olmasında onlar da çox vacibdi. Xatırlayıram, o vaxt "Qarabağ" – “Zaltsburq" oyunundan sonra rəqibin baş məşqçisi mənə yaxınlaşdı və dedi ki, siz insanlarla müntəzəm məşq edirsiz? Mən cavabında dedim ki, biz insanlarla məşq etmirik. O qədər güclü dəstək olmuşdu ki, baş məşqçi oyunsonrası mətbuat konfransında "futbolçularıma tapşırıqlarımı çatdıra bilmirdim, sanki meydana helikopter düşürdü" demişdi.

Avropada komandaya dəstək olarkən hər kəs qoşulur. Çünki onlar futbolun bir parçası olduqlarını bilirlər. Bizdə bəzi insanlar 90 dəqiqə güclərini vermək istəmirlər. Hazırda "İmarət tayfa" və "Qarabağ Ordu" böyük dəstək göstərir. Gələn 31 min azarkeşin 15 mini onlara qoşulsa hər şey tam fərqli olar. Bu, "Braqa" ilə matçda oldu. İlboyu gələn azarkeşlər artıq işi bilir və dəstək göstərir. "Bayer-04"lə oyunda azarkeşlərdən daha çox dəstək gözləyirdim".