“Leverkuzendəki matçda şanslar 50-nin 50-yədi”

Avropa Liqasının 1/8 finalında “Qarabağ” “Bayer-04”ü qəbul edib.

“Football-plus.az” xəbər verir ki, matçdan sonra qonaqların baş məşqçisi Xabi Alonsonun mətbuat konfransı keçirilib. Sizi onun fikirləri ilə tanış edirik:

"İkinci yarıdakı matçı cavab görüşündə də meydanda göstərməyə çalışacağıq. Bilirdim ki, bizi çətin rəqib gözləyir. Çətin oyun oldu. Bilmirəm gələn həftə necə olacaq. Qarşımızda güclü komanda var idi".

- Qurban Qurbanovla dostluğunuz sanki hesabda da əksini tapdı..
- Bunun heç bir təsiri olmadı. Çünki oyuna təsiri oyunçular göstərir. Onları oyuna hazırlamağa çalışırıq.

- Bu gün uduzsaydınız məğlubiyyətsiz seriyanız qırılacaqdı. Çox üzüləcəkdiz?
- Mən buna çox fokuslanmıram. Mənim üçün əsas olan komandanın yaxşı oyunudu. İlk məğlubiyyət olsa belə, bu ab-havanın komandada qalmasını istəyirəm. Fasilədən sonra yaxşı olmayan nəticəni düzəltdik.

- Sizcə, “Qarabağ”ın bəxti gətirmədi, sizin bəxtiniz gətirdi?
- Bəli, razıyam. Bizim bəxtimiz gətirdi ki, 2:2 etdik. “Qarabağ”ın bəxti gətirmədi. Şanslardan yararlana bilmədilər. Bir həftədən sonra da Leverkuzendəki matçda şanslar 50-nin 50-yədi.

- “Qarabağ”a qədər Azərbaycan futbolu haqda nə eşitmişdiz, nə bilirdiz?
- Qurban Qurbanovun təcrübəsi çoxdu. "Qarabağ"ın "Atletiko”ya qarşı ÇL-dəki oyunlarını da xatırlayıram. Qurban Qurbanovu komandanı neçə illərdir çempion edir, avrokuboklara çıxarır. O, böyük işlər görür.

- İlk dəqiqələrdən əsas heyətin əksər oyunçularını meydana buraxmamışdınız. Bu nə ilə bağlıdı? Fasilədən sonra meydana çıxanlar “Bayer”i məğlubiyyətdən xilas etdi...
- Mən hər bir oyunçuma inanıram. Bugünkü heyətin də “Qarabağ”ı uda biləcəyini düşünürdüm. Hər bir məşqçi üçün ehtiyat skamya da vacibdi. Şadam ki, onlar meydana çıxaraq komandanın qollarını vurdular.

- Bu "Bayer"in ən zəif birinci hissə idi. Fasilədə futbolçulara nə dediz?
- Bura Bundesliqa oyunu deyildi, pley-off oyunu idi. İlk yarı ən zəif birinci hissə deyildi. Amma hər şey istədiyimiz kimi alınmadı. Vacib olan odur ki, ehtiyatdan meydana girənlər matçın gedişatını dəyişdilər və iki qol vurduq.

- "Qarabağ"la üç oyun oynamısız. Sizcə, "Qarabağ"ın hansısa futbolçusu top liqalarda oynayacaq potensiala malikdi?
- Çox yaxşı, keyfiyyətli oyunçular var. Bəziləri Bundesliqada oynaya bilər. "Qarabağ"ın özü də Bundesliqada oynaya bilər. Amma oyunçuların adını isə çəkmək istəmirəm.

- Çox qol şanslarınız olmadı, ilk qolda da Abdullah Zubir sizə kömək etdi. Niyə son matçlarda çox qol şansları yarada bilmirsiz?
- Bunu analiz edəcəyik. Topu üçüncü zonaya çatdırmaq bizdə alınmırdı. Səhvləri düzəltməyə çalışacağıq.