Bu gün “Qarabağ” Avropa Liqasının 1/8 final mərhələsinin ilk oyununda “Bayer-04”lə qarşılaşıb.

Avropa Liqası, 1/8 final, ilk oyun
Qarabağ – Bayer-04 (Almaniya) 2:2
Yassin Benziya, 26, Olavio Juninyo, 45+2 - Florian Virtz, 70, Patrik Şik, 90+2
Hakimlər: BENUA BASTYEN, Hişam Zakrani, Orelyen Bertomye, Jeremi Pinyar (hamısı Fransa).
VAR hakimi: Benua Miyo (Fransa).
VAR hakiminin köməkçisi: Erik Uattelye (Fransa).
UEFA nümayəndəsi: Alpaslan Kavas (Türkiyə)
Hakim-inspektor: İtçko Loves (Bolqarıstan)
7 mart. Bakı. Tofiq Bəhramov adına Respublika stadionu. Saat 21.45.

“Qarabağ” pley-offda ölkəmiz üçün tarixi ilkə imza atdı - “Braqa”nı üstələməklə bu mərhələyə vəsiqə qazandı. İndi daha bir ilk yaşana, tarix yazıla bilər. Ağdamlıların oyuna çox ciddi hazırlaşdığını bilirik. Nəinki azərbaycanlı futbolsevərlərin, demək olar ki, qitənin müəyyən hissəsinin diqqəti bu oyundadı. Rəqib isə bizə yaxşı tanışdı. Xatırladaq ki, “Qarabağ” “Bayer-04”lə Avropa Liqasının qrupunda da mübarizə aparmışdı. “Köhlən atlar” bu komandaya səfərdə 1:5, Bakıda isə 0:1 hesabıyla uduzmuşdu. Sonda leverkuzenlilər qrup lideri kimi 1/8 finala, “Qarabağ” isə 2-ci yerin sahibi kimi pley-offa yüksəlmişdi. Qurban Qurbanovun köməkçisi Elçin Rəhmanov və müdafiəçi Elvin Cəfərquliyev “Braqa” ilə Bakıdakı oyunda qırmızı vərəqə alıb. Həmçinin Julio Romao da sarı vərəqə cəzalısıdı. Belədə onlar komandaya kömək edə bilməyəcək. Zədəli Kevin Medinanın meydana çıxıb-çıxmayacağı isə dəqiq deyil. Təxmini start heyətini diqqətinizə çatdırırıq: Andrey Lunyov, Bədavi Hüseynov, Bəhlul Mustafazadə, Toral Bayramov, Maksim Medvedev, Marko Veşoviç, Abdulla Zubir, Yassin Benzya, Marko Yankoviç, Leandro Andrade, Olavio Juninyo.

Rəqib qeyd-şərtsiz hazırda Avropanın hazırda ən güclü komandalarından biridi. Xabi Alonsonun komandası cari mövsümdə bircə məğlubiyyət də yaşamayıb, qitəni lərzəyə salıb. Qısası, istər ölkə kuboku, istər çempionat, istərsə də avrokubok oyunlarında qarşısına çıxanı əzməklə məşğuldu. Cari mövsümdə 34 (24 çempionat, 6 avrokubok, 4 ölkə kuboku) rəsmi oyuna çıxan Leverkuzen təmsilçisi 30 qələbə qazanıb, 4 dəfə heç-heçə edib. “Qarabağ” üçün cüzi sərfəli məqam aparıcı futbolçulardan Viktor Bonifasın yoxluğudu. O, Afrika Millətlər Kuboku zamanı Nigeriya millisinin heyətində ciddi xəsarət aldığından aprelə kimi yaşıl meydanlara qayıtması real görünmür. Bonifasın “Qarabağ”la qrupdakı hər iki görüşdə (5:1, 1:0) fərqləndiyini də xatırladaq.

Heç şübhəsiz, “Bayer-04” cütün taleyini məhz Bakıda həll etmək istəyəcək. Amma bunun heç də asan olmayacağına inanırıq. Futbol sürprizlərlə zəngindi, “Qarabağ” isə dəfələrlə çox güclü rəqiblərlə bərabər səviyyədə oynamağı bacardığını göstərib. Hələ ki Bakıda uduzmayaq, sonrasına baxarıq...

KƏNAN BAHADIR