“Bu etimadı doğrultmağa çalışacam”
İdman paytaxtı Qubada keçirilən 5 - mart Bədən Tərbiyəsi və İdman günündə gənc səfirlərin kimliyi artıq bəllidi.
“Football-plus.az” xəbər verir ki, bunlardan biri də veteran futbolçu, eyni zamanda millimizin seleksiyaçısı İlqar Qurbanovdu.
O, səfir seçilməsinə belə münasibət bildirdi:
“İlk növbədə Gənclər və İdman Nazirinə çox təşəkkür edirəm. Mənə etimad edərək bu vəzifəni layiq gördülər. Bu etimadı da ən yaxşı şəkildə doğrultmağa çalışacam. Ən çox istədiyim futbolu və idmanın qalan bütün növlərini inkişaf etdirmək, eyni zamanda daha çox gəncimizi idmana cəlb etməkdi. İnşallah ki, bu istiqamətdə çalışacayıq”.
Təcrübəli mütəxəssis xalqımızı od çərşənbəsi münasibətiylə təbrik edərək növbəti futbol mövsümü üçün arzularını dedi: “İnşallah ki, bu il ölkə futbolu üçün uğurlu olar və həm “Qarabağ”, həm də milli komandamız bizi sevindirər.
Yeri gəlmişkən ondan çempionatdakı rəqabətin yalnız 2-ci yer uğrunda olduğunu və “Qarabağ”ın demək olar ki, ciddi müqavimətsiz irəlilədiyini, növbəti mövsüm üçünsə çempionqluq uğrunda olub-olmayacağını soruşduq:
“Əlbəttə, ola bilər. Hamı da bunu istəyir. Təbii ki, “Qarabağ”la mübarizə asan deyil. Ancaq ümid edirəm ki, digər klublarımız da “Qarabağ”la rəqabət apara biləcək”.
Milli komandanın baş məşqçi postunun boş olmasının da onların seleksiya işlərinə necə təsir etdiyini, həm də yeni baş məşçinin kimliyi barədə məlumatının olmadığını söylədi: “Hələ ki, bu barədə heç nə yoxdu. Çalışmalarımız gedir. Gənc oyunçularımız var. Hansı ki, aşağı yaş qruplarından dəvət edirik. İnşallah ki, 2-3 ilə 1-2 yerli futbolçu milliyə gələcək”.
Digər xəbərlər
