Helmut Marko maraqlı müsahibdi, avtoidman dünyasının problemlərinə hamıdan yaxşı bələd olan adamlardandı.

“Red Bull”un avtoidman üzrə məsləhətçisi son müsahibəsində bu komandanın rəhbəri Kristian Hornerə yönələn ittihamlardan, Lüis Hemiltonun “Mersedes”i “Ferrari”yə dəyişmək qərarından, Maks Ferstappenin indiki komandasından getməsinin mümkün olub-olmamasından danışıb.

- Kristian Horner ətrafındakı vəziyyət komandanızın mövsümöncəsi testlərə, eləcə də yeni mövsümə hazırlığına nə dərəcədə təsir edir?
- Bu mövzuda sizə heç nə deyə bilmərəm. Nə qədər ki təhqiqat gedir və ortada hansısa nəticə yoxdu, məndən heç bir söz ala bilməzsiz. Proses davam edir və ümid edirəm ki, tezliklə bu turbulentliyi nəzarət altına ala biləcəyik. Xoşbəxtlikdən yeni mövsüm üçün maşınımız qurulub və biz yaxşı hazırlaşmışıq.

- Belə deyirlər ki, Maks Ferstappen ötənilki maşınla da yeni mövsümdə asanlıqla çempion ola bilərdi...
- Tam bir boşboğazlıqdı. Ötən il bəzi trasslarda “Maklaren” artıq sürətinə görə bizə çatmışdı, ancaq onlarda sabitlik yox idi.

- Yeni RB20 maşını nəyə qadirdi?
- Bunu biz ancaq Bəhreyndəki testlərdə biləcəyik. İndi onu demək olar ki, yeni maşın yetərincə yaxşı olan ötənilkinin təkamülü nəticəsində yaranıb. Bəzi zəif yönləri aradan qaldırsaq, qorxulu heç nə baş verməyəcək. Ancaq kim bilir, bəlkə də rəqiblərimiz yeni maşın hazırlayarkən hansısa hiyləgər gediş edə bilib.

- Bir halda ki rəqibləri xatırlatdız, onda Lüis Hemiltonun “Mersedes”dən “Ferrari”yə keçidi haqda nə deyə bilərsiz?
- Bu xəbər də məni təəccübləndirdi. Gözlənilməz anda əsl idman sensasiyası baş verdi. Bütün bu hadisələrin necə baş verməsi maraqlıdı. 2023 mövsümünün ikinci yarısında “Mersedes” “Ferrari”ni ötdü, elə “Maklaren” də sürətli idi. Bəlkə də Hemilton qalan bütün dünyanın diqqətini cəlb etməyən nəsə aşkara çıxarıb.

- Onun qərarı “Red Bull” üçün nəyisə dəyişəcəkmi?
- Bu qərar bizim üçün heç nəyi dəyişmir. Hə, Hemiltonun gedişi “Mersedes”i zəiflədəcək. Bəs britaniyalı pilot “Ferrari”ni gücləndirəcəkmi – bu hələ bəlli deyil. Ümumilikdə Lüisin keçidi bir çox sahələrə, o cümlədən fond bazarında səhmlərin qiymətinə də təsir göstərdi. Belə hadisələrin yaşanması əslində yaxşıdı.

- Lüis hələ “Mersedes”də daha bir mövsüm keçirməlidi...
- Doğrudu. Adətən, belə vəziyyətlərdə pilot daha çox yeni komandasına köklənir, indiki komandası isə ona artıq yeniliklər haqda bilgi verə bilmir, çünki pilot bunları özü ilə aparacaq. Ancaq avtoidman üçün Hemiltonun keçidi əla xəbərdi. “Netflix”dəkindən daha yaxşı tarixçədi.

- Ferstappen Hemiltonun qərarına necə reaksiya göstərdi?
- Bu xəbər onu, sadəcə, əyləndirdi.

- Hər şeydən belə görünür ki, Toto Volff “Mersedes”i Maks üçün cəlbedici varianta çevirməyə çalışır...
- Əslində bu, komandanın rəhbəri kimi onun işidi. Volff mümkün olan hər şeyi edir ki, ən yaxşı pilotları komandasına “çəksin”.

- Maksın maraqlı təklif qarşısında dayana bilməyəcəyindən ehtiyatlanmırsız?
- Yox, onun yaddaşı yaxşıdı. Ötənlərdə çox hadisə baş verib. Sadəcə, 2021-də Silverstounda yaşananları və ya Əbu-Dabidə mövsümün finalında olanları xatırladıram. Bütün bunların dərin kökləri var.

- Toto Volff bir müddət əvvəl demişdi ki, Hemiltonla o dərəcədə yaxındı ki, aralarından hətta bir vərəq keçmir...
- Ancaq “Ferrari” ilə müqavilə keçdi.

- Maks qəfil komandadan getdiyini desə, nə edəcəksiz?
- Mənim üçün belə variant istisnadı.