“UEFA-nın mənzil-qərargahında bizə çox isti münasibət göstərdilər. Ardıcıl ikinci dəfə püşkatmada iştirak edirəm. 1/8 finala yüksəldikdən sonra pley-offun püşkatmasından daha fərqli münasibət gördük. Qurumun baş katibinin müavini Corco Markettinin və tədbirin bütün aparıcılarının “Qarabağ” haqda xüsusi danışması, komandamızın 1/8 finala möhtəşəm mübarizə ilə yüksəldiyini vurğulaması məni qürurlandırdı. İrlandiyanın paytaxtı Dublində keçiriləcək final oyununun səfiri, “Mançester Yunayted”in əfsanələrindən olan Con Oşi özü də bunu xüsusi qeyd etdi. “Braqa” səddini keçməklə bütün Avropanı təəccübləndirdik. Hamı “Qarabağ”a ehtiramla, heyranlıqla yanaşır. “Qarabağ” sözünün, Azərbaycan bayrağının bu səviyyədə tanınması göstərir ki, klubumuzda böyük iş görülüb. Mən bir azərbaycanlı kimi fəxr edirəm ki, bu mərhələyə qədər irəliləmişik. 1/8 finalda ən yaxşılar oynayır. Avropada 1000-dən çox klub var və biz Avropa Liqasının 16 ən yaxşısı arasına düşmüşük. Bunun özü tarixi uğurdu. Xalqımızı və Ali Baş Komandanımızı təbrik edirəm”.

“Oyun bitəndən sonra birbaşa hava limanına yollandıq. Səhər saatlarında artıq Cenevrədəydik. Dörd nəfərlik heyətlə getmişdik. Tədbirdə klub prezidenti və İdarə Heyətinin sədri Tahir Gözəl, UEFA ilə əlaqələndirici Fərid Ağayev, beynəlxalq əlaqələr üzrə menecer Vüsal Həsənov və mən iştirak etdik. Həmişəki kimi, hər şey yüksək səviyyədə və standartlara uyğun təşkil edilmişdi. Həmin gün Avropa Liqasıyla yanaşı, Konfrans Liqasının da püşkü atıldı. Yəni həmin turnir iştirakçılarının nümayəndələri də tədbirdə idi. Tədbirin gedişində “Qarabağ”ın adı xüsusi qeyd edildi və uğurlarımızdan söz açıldı. Bildirildi ki, 1/8 finala vəsiqəni dramatik və mübariz oyun şəraitində qazanmışıq. Hazırda gəlib çatdığımız səviyyənin yüksəkliyini həm top-klubların nümayəndələri, həm də UEFA rəhbərliyində təmsil olunan şəxslər dilə gətirdi. Onlar “Qarabağ”a simpatiyalarını gizlətmədi. Ümumiyyətlə, bütün klublar bizi tanıdı və əvvəllər rəqib olduğumuz komandaların hamısından təbrik eşitdik. Yaxınlaşıb əlimizi sıxdılar. “Braqa” ilə matçı izləyərkən keçirdikləri hissləri bizimlə bölüşdülər. Bundan başqa, UEFA-nın özünün də bizə marağı var idi. Tahir Gözəl uefa.com saytına videomüsahibə verdi. Bundan başqa, özəl agentliklərdən biri də Tahir bəyin fikirlərini öyrəndi. Püşkatmadan sonra “Bayer-04”ün nümayəndələriylə müzakirələr apardıq. Rəqib qısa müddət öncə oynadığımız və tanış komanda olduğundan, təşkilatçılıq məsələsində yeni nəsə gözlənilmir. Hər şey həmişəki qaydada olacaq”.

“Xeyr, bütün şarlar açıldı. Ümumiyyətlə, orda açılmayan şar qalmır. Heç bir poblem yoxdu. Biz elə məqam görmədik”.