Markinyosun Avropa karyerası çox da uzun sürməyib. Gənc futbolçu vətəninə qayıdıb.

"Football-plus.az" xəbər verir ki, “Arsenal” onu “Fluminense”yə icarəyə verib. 20 yaşlı hücumçu Braziliya klubunda bu status ilə ilin sonuna qədər çıxış edəcək. Müqavilədə “Fluminense”nin onu İngiltərə klubundan birdəfəlik almaq hüququ ilə bağlı bənd nəzərdə tutulub. “Arsenal” Markinyosu 2022-ci ilin yayında “San Paulu”dan alıb. Futbolçu ötən müddətdə “topçular”ın formasında rəsmi oyunlarda yalnız bir dəfə meydana çıxmaq şansı qazanıb. Son mövsümün ikinci yarısını icarə qaydası ilə “Norviç”də keçirən braziliyalı cari mövsümün ilk dövrəsində eyni statusla “Nant”da çıxış edib. Fransa çempionatında keçirdiyi 7 oyunda 1 məhsuldar ötürmə verən Markinyosun “Arsenal”a müqavilə ilə 2027-ci ilin yayına qədər bağlı olduğunu da bildirək. “Transfermarkt” gənc futbolçunu 7 milyon avro dəyərləndirir.