Avropa Superliqası ətrafında həyəcan getdikcə artır. Avropa İttifaqına (Aİ) daxil olan ölkələr yeni turnirin təşkilinə qarşı çıxıb.

“Football-plus.az” xəbər verir ki, daxili yarışlarda və Avropanın bütün futbol turnirlərində illik nəticələr arasında əlaqəni təmin etmək üçün hazırlanmış müvafiq bəyanat İspaniya istisna olmaqla təşkilatın bütün üzvləri tərəfindən imzalanıb. Pireney ölkəsinin bəyanata qoşulmaması “Real” və “Barselona” ilə bağlıdı. Çünki hazırda hələ ki kağız üzərində olan layihəni yalnız bu iki klub dəstəkləyir.

Xatırladaq ki, 2021-ci ilin aprel ayında 12 klub – (“Real”, “Barselona”, “Atletiko”, “Yuventus”, “Milan”, “İnter”, “Mançeser Yunayted”, “Mançester Siti”, “Çelsi”, “Liverpul”, “Tottenhem” və “Arsenal”) Superliqanın yaradıldığını elan etmişdi. FİFA və UEFA-nın xəbərdarlığından və qitədə böyük azarkeş kütləsinin etirazından sonra “Real”, “Barselona” və “Yuventus”dan başqa digər klubların layihəni tərk etməsi ilə Avropa Superliqasının reallaşması təxirə salınmışdı. Lakin bir müddət əvvəl sözgedən klublar layihəni yenidən gündəmə gətirmişdilər. Ötən il dekabrın 21-də Avropa Məhkəməsi FİFA və UEFA-nın yeni turnirlərin yaradılmasına mane olmaqla bağlı cəhdlərini qanunsuz elan etmişdi.