Ölkəmizin qadınlardan ibarət voleybol yığmasının kapitanı Ayşən Abduləzimova karyerasını Macarıstan “Vaşaş”ında davam etdirir.

“Vaşaş” ötən həftə CEV kubokunun 1/4 finalında evdə “Levallu”ya (Fransa) 1:3 hesabı ilə məğlub olub. “Football-plus.az” olaraq, 30 yaşlı idmançı ilə əlaqə saxladıq.

- Parisdəki qarşılaşma ilə bağlı nə düşünürsən? Fransa komandasını keçə biləcəksizmi?
- Məqsəd CEV kubokunda yarımfinala adlamaqdı. Bunun üçün də Parisdə mütləq qələbə qazanmalıyıq. Rəqibimiz yetərincə güclü komandadı, həm də evdə oynayacaq. Lakin biz də bu oyuna daha yaxşı hazırlaşmışıq, rəqibi daha yaxşı təhlil etmişik. Düşünürəm ki, tam hazırıq.

- Evdəki məğlubiyyətə səbəb nə oldu?
- Çox səhv etdik. Oyun istədiyimiz kimi alınmadı. Yaxşı başlasaq da, sonradan bunu davam etdirə bilmədik və sadə səhvlər üzündən məğlub olduq. Amma düşünürəm ki, növbəti mərhələyə keçmək üçün böyük şansımız var. Qalib gəlmək üçün əlimizdən gələni edəcəyik.

- Faiq Qarayevin yığmanın baş məşqçisi təyin olunduğunu bilirsən. Bununla bağlı nə düşünürsən?
- Faiq Qarayev Azərbaycan voleybolunun ən təcrübəli, ən yaxşı mütəxəssislərindəndi. Millimiz bundan əvvəl də onun rəhbərliyi ilə bir çox nailiyyət qazanıb. Əlbəttə, Faiq müəllimin millidə olması oyunumuza müsbət təsir edəcək.

- Qarayev yığmanı yeni səviyyəyə çıxara biləcəkmi ?
- Milli indiyə kimi ən böyük nəticələri elə Faiq müəllimin baş məşqçiliyi ilə qazanıb. İnanıram ki, onun rəhbərliyi ilə yenə istədiyimiz nəticəni əldə edəcəyik.

- “Vaşaş”la müqavilənin müddəti nə vaxta qədərdi?
- Hazırda bu məsələ ilə bağlı danışıqlar gedir.

- Karyeranı Azərbaycanda davam etdirmək fikrinə necə baxırsan?
- Əlbəttə, hər idmançı öz ölkəsinin çempionatında çıxış etmək, evinə və ailəsinə yaxın olmaq istəyir. Lakin xarici çempionatlarda oynamaq da hər bir idmançının arzusudu. Bu həm də oyunçuların daha çox təcrübə qazanması, daha fərqli sistem öyrənməsi deməkdi. Növbəti illərdə belə bir imkan yaranarsa, böyük məmnuniyyətlə Azərbaycanda oynayaram.

GÜNAY SÜLEYMANOVA