MY-də yenə sakitlik pozulub.

"Football-plus.az" xəbər verir ki, Ceydon Sançonun “Borussiya”ya qalmaqallı gedişindən sonra paltardəyişmə otağında ab-havanın düzələcəyini düşünənlər, görünür, Markus Reşfordun varlığını unudub. Bəs o nə edib?

İngiltərə kuboku çərçivəsində şənbə günü “Nyuport”la keçirilən oyundan əvvəl Erik ten Haq ənənəvi olaraq, mətbuat önünə hansı oyunçuların meydana çıxa bilməyəcəyi haqda danışıb. Malasia ilə Mauntun xidmətindən yararlana bilməyəcəyini deyən baş məşqçi Evansla Reşfordun də xəstə olduğunu vurğulayıb.

Mətbuat konfransından dərhal sonra sosial şəbəkələrdə Belfastın əyləncə mərkəzlərində dolaşan Markusun şəkilləri və videoları görünüb. Bunları yayanlar dəqiqləşdirib ki, ingiltərəli forvard həmin yerlərdə guya xəstəlik üzündən çıxmadığı cümə məşqindən az əvvəl olub. Reşfordun baş çəkdiyi “Lavery” barının əməkdaşlarından biri dostuna videomüşahidə kamerasının yazısını göndərib. Onun dediyinə görə, futbolçu yalnız alkoqol qəbul etməyib, elektron siqaret də çəkib.

“Daily Mail” nəşri məsələyə belə aydınlıq gətirdi: “MY-də əmindilər ki, oyunçunun iştirak etdiyi videoçarx istirahət günündən əvvəl – çərşənbə günü çəkilib, yəni hücumçu rejimi pozmayıb”. “The Telegraph” da azarkeşləri sakitləşdirib: “Reşford həqiqətən də icazəli olduğu gündə yaxın dostu ilə birgə Belfastda olub”.

“The Athletic”in informasiyasına görə, Markus Şimali İrlandiyanın paytaxtında çərşənbə günü və cümə axşamı istirahət edib. Özü də təkcə “Lavery” barında yox, “Thompsons” pabında da, ardından “Thompsons Garage” gecə klubunda da. İdmançı iki gün ərzində üç əyləncə məkanına baş çəkib, cümə günü səhər saat 8-də isə özəl təyyarə ilə İngiltərə qayıdıb. O, özünü məşqə çatdırsa da, kluba xəstələndiyini deyib. “Nyuport”la oyuna bir neçə saat qalmış “Yunayted”in mətbuat xidməti açıqlama yayaraq, “Reşfordun kubok oyunununda iştirak ərizəsində düşmək üçün yetərincə sağlam olmadığını” bəyan etdi.

Mankunianlar 4-cü divizion təmsilçisini çətinliklə (4:2) keçsə də, Markusla bağlı durum məğlub komandanın azarkeşlərini əməllicə əyləndirdi. Onlar tribunada belə banner asmışdı: “Reşford, həftəlik maaşını bizə verərsənmi?”

Belə görünür ki, Ten Haq futbolçusunun belə hoqqasına qətiyyən hazır deyilmiş. Jurnalistlərin çətin suallarından yayınmaq istəyən mütəxəssis onlara belə dedi: “Bu, klubun daxili işidi, özüm ondan haqq-hesab soracan. Reşfordun cəzası? Bir daha təkrar edirəm ki, bu, klubdaxili məsələdi”.
Bazar ertəsi, yəni yanvarın 29-da “The Sun” xəbər verdi ki, futbolçunu ikihəftəlik maaşı (764 min avro) həcmində cərimə gözləyir. Həmin gün axşam saatlarında isə mankunianların mətbuat xidməti rəsmi açıqlama yaydı: “Markus hərəkətlərinə görə məsuliyyətini boynuna aldı. Bu vəziyyətə daxili intizam işi kimi baxıldı və qapandı”.

İş ondadı ki, bu, Markusun ilk hoqaası deyil. O, ötən ilin noyabrında “Chinawhite” gecə klubuna baş çəkmişdi. Özü də premyer-liqanın 10-cu turunda “Mançester Siti”dən alınan acı məğlubiyyətdən (0:3) sonra. Ten Haq onda publikanı əmin edirdi ki, Reşford başverənlərə görə çox məyusdu: “O, vəziyyəti düzəltmək üçün motivasiyalıdı. Necə çalışdığını görürəm. Səhvə yol verib, ancaq meydandan kənarda etdikləri, necə yaşaması... Əminəm ki, komandaya yardım etmək üçün çalışır”.

Forvard ötən mövsüm də rejimlə bağlı problem yaşayıb. 2022-ci ilin dekabrında intizam pozuntusuna görə “Vulverhempton”la oyunda ehtiyatda qaldı. Sonradan aydın oldu ki, ingiltərəli ulduz yatıb qaldığından komandanın iclasına gecikib.

Təbii ki, Reşfordun durumu İngiltərənin futbol ictimaiyyətinin diqqət mərkəzindədi. Məsələn, Alan Şirer BBC-nin efirində onunla bağlı bunları deyib: “Bu, daxili məsələdisə, düşünmək olar ki, nəsə baş verib. Reşford böyük istedada malikdi. Biz onun ötən mövsüm oyunöncəsi iclasa gecikdiyinə görə necə cəzalandığını görmüşük. Ancaq indi vəziyyət fərqlidi. Ya evdə işlər yolunda getmir, ya da klubla münasibətlər baxımından problem var. O, belə davranışı davam etdirməməli, istedadını boşuna xərcləməməlidi. Çünki belə davranış düzgün deyil. Ona güclü nəzarət lazımdı. Elə bir adam lazımdı ki, ona belə davam edəcəyi halda karyerasının sonunda peşman olacağını desin. Belə hərəkət etmək olmaz. Ötən mövsüm 30, bu mövsüm isə cəmi 4 qol... (“Vukverhempton”la oyundan əvvəl yazılıb – red.) Onun oyununa baxanda adama elə gəlir ki, bütün dünyanın yükü çiyinlərindədi. Gerçəkdən bu durumun öhdəsindən təkbaşına gələ bilməz”.

Yəqin ki, Markusun “Nyukasl”ın əfsanəsinin sözləri üzərində düşünməsinə dəyər. Həqiqətən də o, bu mövsüm özünə bənzəmir. Qorxunc statistika (26 oyunda 4 qol) üzündən Reşford Britaniya mediasının və “qırmızı şeytanlar”ın azarkeşlərinin hədəfinə çevrilib. Oyun keyfiyyəti öz yerində, problemlərin tam bir kompleksi görünür: psixoloji, intizamsızlıq, motivasiyanın itməsi. Ancaq ən qorxulu məqam budu ki, nə baş məşqçi, nə də futbolçu özü vəziyyətdən necə çıxmalı olduqlarını bilmirlər.