“Real”ın heç bir oyununu qaçırmıram” - 80 yaşlı Hacı İsmayılov futbol həvəskarıdı
“Səbail” cari mövsümün əvvəlindən maraqlı təşəbbüsə əl atıb.
Belə ki, komandanın ev oyunlarında görkəmli mədəniyyət xadimləri və ya tarixi günlər ilə bağlı pankart açılır. “Dənizçilər”in “Zirə” ilə oyununda bu təşəbbüsün obyekti yanvarın 22-də 80 yaşını tamamlayan teatr vı kino aktyoru, xalq artisti, Teatr Xadimləri İttifaqının sədr müavini Hacı İsmayılov idi.
Bəs səbəbkar personasına belə diqqətdən xəbərdardımı, ümumiyyətlə, futbolla arası necədi? Hacı müəllimi 80 yaşının tamam olması münasibəti ilə təbrik etməklə yanaşı, bu suallara da cavab aldım:
“Bu məsələdən xəbərim var. Futbolla imkan daxilində maraqlanıram. Mən də o vaxt futbol oynayırdım. İçərişəhərdə yaşayırdıq. Topumuz olmasa da, corabları, köhnə parçaları bir-birinə bağlayıb top düzəldir, futbol oynayırdıq. Yaxşı reaksiyam olduğuna, cəldliyimə görə əsasən qapıçı olurdum. Ümumiyyətlə, futbolu çox sevirəm. İstər millinin, istərsə də xarici klubların oyunlarına baxıram. Neçə illərdi “Real” azarkeşiyəm. Demək olar ki, heç bir oyununu qaçırmıram. Bütün idman növləri yaxşıdı, amma futbolun özünəməxsus gözəlliyi, estetikası var”.
GÜNAY SÜLEYMANOVA
Digər xəbərlər
