"İki il öncə yaranan klubuq. Çempionatda ikinci yeri tutduq və avrokubokda iştirak şans qazandıq. Orda iştirak üçün həm maliyyə, həm də başqa fəaliyyət lazımdı. Bu da tək bir insanın əlindən gələn iş deyildi. Məsələn, biri su, digəri trenajor, o biri sağlıq problemi ilə maraqlanır. İdmançının maaşı ilə yanaşı, çoxlu əlavə xərc var ki, bunları qarşılamağa vəsait lazımdı. Bir mövsüm üçün 1,2 milyon manat büdcə müəyyənləşmişdi. Bu da bir yox, Laçınla Şuşanı təmsil edən iki komanda, eləcə də aşağı yaş qrupları üzrə 4 komanda üçün idi. Sonra Hacı Nuran bəyi dəvət etdilər. Dedi ki, məmnuniyyətlə sponsorlar gətirəcəm, bu büdcə nədi, daha çox olacaq və hər şey yaxşıya doğru gedəcək. Ümidimizi üzməyərək gəlib çıxdıq bu vəziyyətə. Avrokuboka qatılanda federasiya dəstəklədi. Bizə dedilər ki, "Xarı Bülbül” komandası Şuşa adına görə çox önəmlidi. Maliyyə də ayıracaqdılar. Amma sonda heç bir nəticə olmadı, sadəcə, bizi yola verdilər.

Özümə söz vermişəm ki, Azərbaycan Voleybol Federasiyasında rəhbər dəyişiklliyi olana qədər bu ölkədə işləməyəcəm. Sözümün arxasındayam. Çünki voleybolçular 4 ay idi maaşsız, sözümüzə, gördüyümüz işlərə görə qalırdılar klubda. Təkcə bir dəfə maaş verdilər. O da avrokuboklara qatılanda. Özləri biabır olmasın, cərimə ödəməsin, gələcəkdə də avrokuboka qatıla bilsinlər deyə, buna məcbur idilər. Planlaşdırmışdıq ki, heç olmasa, üç mərhələ keçək. Uşaqların əziyyətinə heyfim gəldi, federasiyaya etirazımı bildirdim. Bizə büdcəni azaltmağı məsləhət gördülər, yəni Laçın təmsilçisi dağısın, Şuşa tək qalsın. Onu da düzəltdik. Büdcə düşdü aylıq 34-35 minə. Yenə yardım etmədilər. Yəqin ki, ölkə çempionatı artıq dörd klubla davam edəcək. Biz də anlayırıq ki, AVF heç bir kluba sponsorluq etməli deyil. Sadəcə, səhv etmirəmsə, "Neftçi", "Xarı Bülbül Şuşa" və "Xarı Bülbül Laçın" öz maliyyəsi hesabına ayaqüstə dururdu. Qalan bütün klublara federasiyanın tapdığı adamlar sponsorluq edir. Heç olmasa, bizə də bir sponsor cəlb edə bilərdilər. Çünki biz "Xarı Bülbül" olaraq, bunu bacarmadıq. Hacı Nuran bacarmadığını bildirdi, halbuki vədlər vermişdi. Federasiya ən azı verdiyi sözə əməl edə bilərdi. Getsinlər, çox güclü işlər görürlər, onlarla məşğul olsunlar. Eybi yox, mən qıraqdan baxıb alqışlayaram onları".

"Sosial şəbəkə hesablarında fəaliyyətlərini dayandırdıqlarını bildirsələr də, federasiyaya rəsmi şəkildə müraciət olunmayıb. Ona görə də hələlik dəqiq nəsə deyə bilmərik".