İvan Perişiç “Tottenhem”i tərk edir.

Təcrübəli futbolçu vətəninə qayıdır.

Tanınmış insayder Fabritsio Romano 34 yaşlı xorvatiyalı yarımmüdafiəçinin “Hayduk”a keçəcəyini xəbər verib. O, Perişiçin Split klubunda icarə əsasında çıxış edəcəyini də bildirib. Maraqlıdı ki, futbolçunun aylıq məvacibi rəmzi şəkildə 1 avro nəzərdə tutulub.

İvan “Tottenhem”də 2022-ci ildən çıxış edir. O, bu komandada premyer-liqada 39 oyuna 1 qol vurub. Xorvat futbolçu ötən ilin sentyabrında sağ dizindən ciddi zədə almışdı. Həkimlər cari mövsümün önun üçün erkən sona çatdığını proqnoz vermişdilər. Amma görünür, mövsümün sonuna yaxın yaşıl meydana çıxmaq şansı olacaq. Romano onun yayda “Tottenhem”i birdəfəlik tərk edəcəyini və “Hayduk” ilə daimi əsasda birillik müqavilə bağlayacağını da bildirib.

Yeri gəlmişkən, “Tottenhem” daha bir futbolçu ilə yolları ayırıb. Paytaxt klubunu Yafet Tanqanqa da tərk edib. Rəhbərlik onu icarəyə göndərib. London klubunun mətbuat xidmətinin yaydığı məlumata görə, Yafet mövsümün sonuna qədər çempionşipdə çıxış edən “Milluoll”da oynayacaq. “Tottenhem”in yetirməsi olan ingiltərəli müdafiəçi son mövsümü icarə əsasında “Auqsburq”da keçirib.