Zaqreb "Dinamo"su mövsümün ikinci yarısına hazırlaşır. Komanda artıq Zaqrebdə yerləşın stadionda məşqlərə start verib.

"Football-plus.az" xəbər verir ki, klubun rəsmi sosial şəbəkə hesablarında bu barədə fotolar yerləşdirilib. Paylaşımların birində Mahir Emrelinin də kollektivlə birgə olduğunu görürük. Diqqətçəkən məqam isə azarkeşlərin şəkilləri qəzəblə qarşılamasıdı. Xorvatiyalılar Sergey Yakiroviçi hədəfə alaraq, klubu tənqid atəşinə tutub. Sizi bəzi rəylərlə tanış edirik.

"Yeni transferlər açıqlanana qədər klub xəbərlərini boykot edirəm. Bu futbolçularla ancaq boş vədlər verə bilərsiz".
"Mahir Emrelini satışa çıxaracağınız yalan idi? Heç olmasa, icarəyə verin!"
"Yaponiyalı hücumçuların gələcəyini dediz, lakin heç birini görmürük. Onlar nə vaxt komandaya qoşulacaq? Təlim-məşq toplanışı bitəndən sonra?"
"Sergey Yakiroviç, gedənlərin adını açıqladın, gələnlərin kim olduğunu da de!"
"Mahiri ilk məşqdə görməyəndə sevinmişdim. İndi isə... Xəyal qırıqlığı..."
"Transfer siyasətinizi düzəldin. Azarkeşləri məyus etməyə haqqınız yoxdu. Çempionlar Liqasıni istəyirik!"
"Deyəsən, yeni transfer yoxdu. Sadəcə, icarədən qayıdanlar komandaya qoşulacaq. Alacağımızı dediyiz futbolçular da artıq özünə yeni klub tapdı. Bu mövsüm də belə bitdi..."

KƏNAN BAHADIR