Yakiroviç "Dinamo"dan ayrılan futbolçuların adlarını açıqladı - siyahıda Mahir də var?
Xorvatiyanın yüksək liqa təmsilçisi "Dinamo" 2023/24 "futbol ili"nin ikinci yarısı üçün hazırlığa start verib.
"Football-plus.az" xəbər verir ki, komanda 3 cəbhədə mübarirəzəyə davam edəcək - çempionat, kubok və Konfrans Liqası.
Baş məşqçi Sergey Yakiroviç kollektivi srağagün bir araya gətirib və ilin ilk məşq prosesi həyata keçirilib. Futbolçular bir həftə Zaqrebdə hazırlıq keçdikdən sonra təlim-məşq toplanışı üçün Rovinjə yollanacaq. Hazırlığın əsas mərhələsi isə yanvarın 8-17-si aralığında baş tutacaq.
Bizim üçün vacib məsələyə keçid alaq. Komandanın qış hazırlıq məşqlərində iştirak edəcək futbolçuların iyahısında millimizin üzvü Mahir Emreli də var. Lakin təkcə siyahıda. Yəni onu "gördüm" deyən yoxdu. Hücumçu bu gün "instaqram" səhifəsində Xorvatiyada çəkdirdiyi yeni şəkilləri paylaşsa da, gələcək karyerasıyla bağlı məlumat verməyib.
Maraqlıdı ki, Sergey Yakiroviç də bu məsələyə toxunmayıb. Mütəxəssis komandadan ayrılan və ayrılacaq futbolçular haqda danışıb. Ətraflı bilgi üçün baş məşqçinin "nezavisne.com" saytına verdiyi açıqlamanı diqqətinizə çatdırırıq:
"Akademiyamızın gənc oyunçuları da bizimlə birlikdə məşq edəcək. Çatışmayan mövqelər üçün gələcəkdə onların xidmətindən yararlanmaq istəyirik. Ristovski yaxın qohumunun vəfatıyla bağlı, Məhərrəmi isə İran millisinin heyətində olduğuna görə bizimlə deyil. Qalan hər kəs yerindədi. Yeni futbolçuyla anlaşmışıq. Sabah tibbi müayinədən uğurla keçsə, müqavilə imzalayacağıq. Yosep Drmiç və Antoni Marinlə mövsümün sonunda vidalaşacağıq. Luka Menalayla bağlı qərarsızıq. İstəyirik ki, hər iki tərəfin razı qalacağı addım ataq. Deni Yuriçi isə icarəyə verəcəyik. Çünki zədəsi təzəcə sağalıb. Bizə bütün gücüylə kömək edə biləcək halda deyil. Xoakin Sosa və Boqdan Mixayliçenko isə yola bizimlə davam etmir. Onların icarə müddəti bitdi və komandalarına geri döndülər".
Göründüyü kimi, Sergey Yakiroviç vidalaşacaqları futbolçu haqda danışarkən Mahirlə bağlı heç nə deməyib. Bu, onu deməyə əsas verir ki, azərbaycanlı forvard "Dinamo"dakı karyerasına davam edəcək. Ya da hələ ki tərəflər hansısa qərarda razılığa gəlməkdə çətinlik çəkir.
KƏNAN BAHADIR
Digər xəbərlər
