“Qəbələ” ilə son pilləni bölüşən “Kəpəz”in sponsor problemi hələ də həllini tapmayıb. Adil Şükürovun gəlişindən sonra nəticələri nisbətən yaxşılaşan komandanın qışdan sonrakı çıxışı maraq doğurur.

Klubun icraçı direktoru İlqar Nadiri ilə söhbətdə bəzi suallara cavab tapmağa çalışdıq.

- Adil Şükürovun gəlişindən sonra “Kəpəz”də nisbətən yüksəliş hiss olunur. Bu tendensiya sizi qane edir? Adil Şükürov komandanı elitada saxlaya biləcəkmi? Bunun üçün ona lazımi dəstək verilirmi?
- Adil Şükürovun gəlişindən sonra komanda uğurlu oyunlar keçirdi, qələbə, xallar qazandı. Oyunçuların döyüşkənliyi və meydançada apardığı mübarizə bizi qane edir. Vacib amil odu ki, bu nəticə azarkeşləri də qane edir. İnanırıq ki, bu mübarizəni davam etdirib komandanı əsas liqada saxlaya biləcəklər.

- Klubun sponsor problemi nə yerdədi? Bu yolda hansısa addımlar atılır? Yeni sponsorluq təklifləri var? Sizcə, kluba sponsor tapılmamasının səbəbi nədi?
- Artıq ikinci ildi elitada çıxış edirik. Heç bir sponsor, heç bir iş adamı və heç bir şirkət tərəfindən dəstək yoxdu. Bunun üçün klub və Futbolun İnkişaf Fondu tərəfindən axtarış davam edir, görüşlər təşkil olunur. Sadəcə, Azərbaycanda futbola sponsor cəlb etmək asan deyil. Bu çətin prosesdi və bunun nə vaxt baş verəcəyini dəqiq deyə bilmərik. Çünki futbola sponsorluq edən şirkətlər həddindən artıq azdı. O cümlədən, “Kəpəz”ə heç bir sponsor yardımı cəlb edə bilməmişik.

- Klubun sponsor, maliyyə problemlərinin olmasına baxmayaraq, iki yerli, iki legioner qapıçınız var. Legioner qapıçınız Vladislav Vasilyuçeki komandaya cəlb edib ehtiyatda saxlayırsız. Onunla müqaviləyə vaxtından əvvəl xitam verəcəksiz, yoxsa sona qədər qalacaq?
- Klubda iki yerli qapıçının olması normaldı. Hətta biz istəyərdik ki, üç yerli qapıçı olsun. Sadəcə, bizə daha çox kömək edə biləcək qolkiperləri komandaya cəlb edə və yaxud da saxlaya bilmədik. Ona görə də məcbur idik ki, qapını legionerə həvalə edək. Bu da öz növbəsində bizim klubun strategiyasına uyğun olan yol deyil. Çünki həm legioner oyunçu limitini itiririk, həm də kifayət qədər vəsait xərcləməli oluruq. Bu il də qapıçı mövqeyi seçimində səhv oldu, ehtimallar doğrulmadı. Vasilyuçeklə bir müddət əvvəl danışılıb. Məşqçilər heyəti və klub olaraq, artıq həmin qapıçıyla yolları ayırmaq qərara alınıb. Sadəcə, gözləyirdik ki, Vasilyuçeki fasilədə yola salaq.

- ”Kəpəz”in akademiyasının tezliklə açılacağı deyilir, guya artıq işlər yekunlaşıb. Bəs akademiya açılışa hazıdı?
- Akademiya açılışa tam hazırdı. Bütün mebel, təchizat və digər işlər yekunlaşdırılıb. Sadəcə, qaz xəttinin istismara verilməsi prosesi qalıb. Bu mərhələdən sonra açılışın tarixi müəyyənləşəcək. Biz də klub olaraq, istəyirik ki, açılış tezləşsin, uşaqlar və əsas komanda buradan istifadə edə bilsin.

- Stadionun təlim-bərpa işləri necə gedir? Hansısa problemlə qarşılaşmırsız?
- Stadionla bağlı bizim məlumat verməyimiz doğru olmaz. Çünki orda klub tərəfindən heç bir iş görülmür. Ordakı işlərin hər biri Gənclər və İdman Nazirliyinin rəhbərliyi əsasında aparılır. Bizim bildiyimiz, sadəcə, ordakı işlərin davam etməsi və söküntü işlərinin tam yekunlaşmasıdı.

MİRKAMAL KAZIMZADƏ