Azərbaycan kubokunda 1/8 finala yekun vurulub.

“Football-plus.az” xəbər verir ki, “Neftçi” “Qaradağ Lökbatan”ı məğlub edib - 4:0. Oyundan sonra “ağ-qaralar”ın məşqçisi Alen-Nikolae Çitanın mətbuat konfransı keçirilib. Sizi onun fikirləri ilə tanış edirik:

- Bu matçda daha çox oynamayanlara şans verildi...
- Bəli. Heyətdə 11 nəfərlik yer var. Məşqdə kim əzmkarlıq göstərirsə, o da əsas heyətdə yer alır. "Qarabağ"la oyundan sonra çətin durumdaydıq. Uduzmuşduq. Kubok oyununa çıxdıq. Bu tip oyunlarda daha çox az oynayanlar meydana çıxır ki, özlərini göstərsinlər.

- İlin son matçına az qalıb. Yəqin ki, Mutu həmin oyunda da olmayacaq. Belə olan halda, əsas yük sizin üzərinizə düşür. "Kəpəz"lə matçdan gözləntiniz nədi?
- Bu oyun haqda danışacağıq, rəqibi analiz edəcəyik. Baş məşqçi ilə də müzakirəmiz olacaq.

- Marko Tamaş "Neftçi"də ilk vaxtlarda əsas heyətdə oynasa da, sonradan əsas heyətdəki yerini itirib. Siz də keçmiş müdafiəçisiz. Tamaş Azər Salahlıdan zəifdi?
- Burda heç bir ayrıseçkilik olmur. Hansı oyunçu daha gərgin məşq edir, o da oynayır.

- Belə çıxır ki, Mark Tamaş Azər Salahlıdan daha istəksiz məşq edir?
- Bu çox sadədi. Hər oyunçunun şansı var ki, əsas heyətdə oynasın.

- "Neftçi" istənilən nəticəni göstərmir. Liderdən 13 xal geri qalmağınızın səbəbini nədə görürsüz?
- Futbol riyaziyyat deyil. Hər dəfə 2+2 4 etmir. Bəzən nəticə 3 və ya 5 ola bilər. Hər futbolçu var gücü ilə çalışmalıdır ki, əsas heyətdə yer alsın. Biz məşqçilər özümüzü təkmilləşdirməliyik.

- Artıq dörd sarı vərəqə almısız. Futbolçu dövründə də belə idiz?
- Bəli. Mərkəz müdafiəçisi olmuşam. Demək istəmirəm ki, nə qədər qırmızı vərəqə almışam. Heç vaxt təslim olmuram. Hər zaman top uğrunda mübarizə aparmağı sevmişəm.