"Bu gün yenə mübarizə apardıq, amma hakim qərəzinin güdazına getdik. Paxtman qol vurduğu epizodda qapıçı meydançasında açıq ayaqla mənə zərbə endirdi. Bu da birbaşa qayda pozuntusudu. Həmin epizoddan sonra çanaq nahiyəmdə yaralar da var. Eləcə də matçın son dəqiqələrində yenə rəqib futbolçu iki açıq ayaqla mənə zərbə endirdi. Həmin epizodda ayaq zərbəsi üz-baş nahiyəmə tuş gəlsəydi, tikişlərin sayı-hesabı olmazdı. Durub bəzi futbolçular kimi soyunmaq, aldığım yaraları göstərmək, reklam etmək istəmirəm. Amma nə baş hakim, nə laysmanlar, nə də VAR-da oturanlar buna məhəl qoyur. VAR sistemi ona görə tətbiq olunur ki, qarşılaşmadakı epizodlarla bağlı şəffaf qərar verəsən, hakim səhvlərini minimuma endirəsən. Amma hər oyunumuzda 5 nəfərlik hakim heyəti daim haqqımıza girir. Artıq bezmişik. Biz mübarizədə uduzmuruq, hakimlərin yanlış, qərəzli qərarlarının qurbanı oluruq. "Neftçi" ilə matçda qapımıza 3-cü top vurulanda futbolçumuza qarşı kobudluq edilir, amma qayda pozuntusu yox, qol qeydə alınır. Etiraz, şikayət edirik, epizodu göstəririk, hakimlər deyir ki, bizim ayrıca video görüntülərimiz var. Hanı o görüntülər? Çıxarın göstərin, qoy hamı görsün. Mən də daxil, bütün "Turan Tovuz" camiəsi yalan yerə referiləri qınamışıqsa, Əliyarda Ağayevdən, Elçin Məsiyevdən və başqalarından üzr istəyərik. Amma ortaya heç nə çıxarmırlar. Tovuz iki ildi böyük futbola qayıdıb, sevinirik ki, elitada oynayırıq, yenu sponsorumuz var, bizə hər cür şərait yaradılır. Buna rəğmən, hakimlər bütün muradımızı gözümüzdə qoyur. Bilmirik onların bizlə dərdi nədi? Bilsəydik, işimizi gücümüzü atıb onlarla problemimizi həll edərdik. Klubumuzun, məşqçilərimizin, futbolçularımızın, azarkeşlərimizin, bizə inananların, qısası, "Turan Tovuz" sevdalılarının haqqına girilir. Əcnəbi futbolçular niyə gətirilir? Ona görə ki, komandaların güclənməyə və daha yaxşı nəticə göstərməsinə ehtiyac var. Futbol hakimliyimizdə nəinki problem, rəziliklər, özbaşınalıqlar var. Yaxşı olar ki, biz də daxil, komandaların haqqına girən referi deyə bilmədiklərimin əvəzinə əcnəbi hakimlər gətirilsə, çempionatımızda daha ədalətli oyunlar idarə olunar və azərbaycanlı hakimlərə də nümunə olar. Burdan media nümayəndələrinə də səslənirəm ki, həm bizin, həm də digər komandaların haqqını yeyən hakimlərin verdiyi qərarlar ictimailəşdirilsin. Qərəzli epizodlar Türkiyə, Rusiya, Avropa ölkələrinin hakim-analitiklərinə göndərilsin. Bu qədər haqsızlığa, özbaşınalığa, qərəzə dözməyə səbrimiz qalmayıb. Nə qədər olar? Haqqımıza girənlər bilsinlər ki, haqqımızı halal etmirik. Arzu edirəm ki, başqalarının haqqına girənlərin özləri daim haqsızlığa məruz qalsınlar".