Bu gün Tovuzda keçiriləcək "Kəpəz" - "Sumqayıt" oyunu maraqla gözlənilir.

Hər iki komandanın açıq futbol sərgiləyəcəyini güman etmək olar. Adil Şükürovun gəlişindən sonra döyüşkənliyi, mübarizliyi ilə seçilən Gəncə təmsilçisinin oyununda canlanma var və komanda sonuncu pillədən qurtulub. Georgi Papunaşvili də dirçəlib. Gürcü forvard ötən tur "Qəbələ" ilə qarşılaşmada dubl etməklə gəncəlilərin qələbəsində əsas pay sahibi oldu. Ardıcıl bir neçə turdakı uğurlu nəticə sayəsində 3-cü pilləyə yüksəlməyi bacaran "Sumqayıt" ötən tur doğma meydanda "Qarabağ" önündə 1:6 hesabıyla darmadağın oldu. İndi Samir Abasov 16-cı turdakı fiaskonu unutdurmaq üçün "Kəpəz"ə qalib gəlməlidi. Gəncəlilər autsayder olmamaq, "kimyaçılar" isə ilk "4-lük"dən uzaqlaşmamaq üçün meydanda döyüşəcək.

Nominal meydan sahiblərindən Papunaşvili, qonaqlardan isə Rövlan, Kamran, Sorqa qol axtarışında olacaq. Hesab edirəm ki, bu gün hər iki tərəf “1 nömrə” kimi çıxış etməyə çalışacaq. Bu komandaların oxşar cəhətlərindən biri də budu ki, müdafiənim mərkəzində effektli deyillər, böyük ehtimalla qapılara vurulacaq qollarda qeyd olunan mövqenin boşluğu rol oynayacaq. Tərəflər hücumda nə qədər kreativlik sərgiləsə də, arxa xətdə az səhv edən komanda uğur qazanacaq.

ABDULLA İSMAYILOĞLU