Avropa futbolunda mövsümlərarası “transfer pəncərəsi” hələ açılmasa da, indidən bir diqqətçəkən keçid baş tutub.

“Football-plus.az” xəbər verir ki, belə ki, “Bavariya” gözlənilmədən İspaniya çempionatının autsayderlərindən olan “Qranada”dan bir futbolçunu heyətinə qatıb. Söhbət Brayan Saraqosadan gedir. Bu transfer Münhen nəhənginə 15 milyon avroya başa gəlib və 22 yaşlı ispaniyalı vingerlə 2028-ci ilə qədər müqavilə imzalanıb. Keçid artıq açıqlansa da, Saraqosa rəsmi şəkildə yanvarda münhenlilərin oyunçusuna çevriləcək. Amma o, icarə əsasında “Qranada”da oynamaqda davam edəcək və yeni klubuna yalnız gələn ay qoşulacaq.

Sürətli yüksəliş
Müasir futbolun əsas insayderi Fabrisio Romanonun məlumatına görə, Almaniyanın digər iddialı klubu “Leyptsiq” də Saraqosaya göz dikmişdi. “Öküzlər” 14 milyon avro ödəməyə razı idilər. Amma onlar bu futbolçunun qışda heyətə cəlb olunmasını istəyirdilər. Keçidə məhz bu məqam mane oldu. Çünki həm Brayan özü, həm də “Qranada” rəhbərliyi onun mövsümü məhz İspaniyada tamamlamasını istəyirdilər. “Bavariya”nın idman direktoru Kristof Froynd indidən bu futbolçunun gəlişini səbirsizliklə gözləyir: “Brayan ən perspektivli ispaniyalı futbolçulardan biridi. Onu neçə müddət idi diqqətlə təqib edirdik. Ona bu mövsüm “Qranada”da uğurlar arzulayırıq. Mövsümün sonunu və bu futbolçunun sıralarımıza qatılmasını səbirsizliklə gözləyirik”.
Brayan Saraqosa 2001-ci ildə əhalisinin sayına görə İspaniyanın ən böyük 6-cı şəhəri olan Malaqada doğulub. Amma yerli komandanın akademiyası ona qapılarını açmadı. “Malaqa”dan başqa “Betis” və “Valyadolid” də bu futbolçuda potensial görmədi. Əsas problem onun fiziki göstəricilərinin zəif olmasında idi. Saraqosanın boyu cəmi 164 sm-di. O, hazırda “böyük beşliy”in ən bəstəboy futbolçusudu! Buna baxmayaraq, 18 yaşı olarkən “Qranada” vingerə qucaq açmağa razı oldu. O bəstəboy olmasını və hava toplarındakı zəif oyununu cəldliyi, sürəti, texnikası və ən əsası isə driblinqi ilə kompensasiya edir. Bu mövsüm Saraqosanın aktivində La Liqada 14 qarşılaşmada 5 qol və 2 məhsuldar ötürmə var. Düzdü, ilk baxışdan bunu möhtəşəm göstərici adlandırmaq çətindi. Amma unutmayaq ki, o, 19-ci pillədə qərarlaşan bir kollektivin şərəfini qoruyur və hazırda “Qranada”nın ən məhsuldar iki oyunçusundan biridi. Onun bu mövsümkü sürətli yüksəlişini bir qədər gözlənilməzlik də saymaq olar. Çünki “Qranada” ötən mövsüm sequndada çıxış edərkən Saraqosa əsas futbolçu sayılmırdı və iştirak etdiyi 34 oyunun cəmi 6-da start heyətində meydana çıxmışdı.

Driblinq ustası
Saraqosa bu mövsüm La Liqada açıq-ara fərqlə ən çox – 82 driblinq edən futbolçudu. Onun ən yaxın izləyicisi olan “Atletik”in vingeri Niko Uilyamsın 73 driblinqi var. O, uğurlu driblinqlərin sayına (40) görə də birinci pillədə qərarlaşıb. Qəhrəmanımız orta hesabla hər oyuna 2,9 driblinq edir. Düzdü, aktivində 30 uğurlu driblinq olan “Real”ın braziliyalı ulduzu Vinisiusun cari “futbol ili”ndə zədələrdən əziyyət çəkdiyini də qeyd etməliyik. AS nəşrinin köşə yazarı Alfredo Relanyo Saraqosa haqda bunları deyib: “İspaniya akademiyalarında adətən hərtərəfli inkişaf edən, taktiki və texniki cəhətdən güclü olan futbolçular yetişir. Məşqçilərin vəzifəsi həmin gənclərin çatışmayan cəhətlərini aradan qaldırmaqdı. Bu isə futbolçunun gözdən düşməsinə və ya ümumiyyətlə, komandadan ayrılmasına səbəb olur. Ona görə də bizdə kiçik yaşlarından istedadı ilə seçilən futbolçuların sayı azalıb. Sabit olaraq belə gənclər əsasən Braziliyada yetişir. Çünki orda yeniyetmələr mini-futbol oynayaraq özəlliklərini daha da inkişaf etdirirlər. Ronaldinyo və Vinisius da orda yetişib. Saraqosa uşaq futbolundan böyük futbola keçid edərkən öz tərzini qorumağı bacaran nadir oyunçulardandı. Bunun sayəsində biz sanki XXI əsrdə XX əsrdən olan bir futbolçu qazanmışıq”. Saraqosa özü də bu nəzəriyyəni təsdiqləyir: “Mən hər zaman topu ələ keçirən kimi qarşımdakı oyunçunu aldadıcı fəndlə keçməyə çalışıram. Topun arxasınca qaçmaq və ya digər şeylər mənlik deyil. Mənim oyunum driblinq üzərində qurulub. Uşaq yaşlarımda səhərdən axşama qədər məhəllə futbolunda oynayırdım. Bu oyun tərzi də məndə həmin illərdən formalaşıb. Bəzən meydanda özümü hələ də öz rayonumuzda oynayırmış kimi hiss edirəm”. Saraqosanın kumirləri də təbii ki, driblinq ustalarıdı: “Hər zaman Messini və onun topla hərəkətlərini böyük diqqətlə izləyirdim. Neymarın oyununu da bəyənirdim. Son dönəmlərdə isə oyununu ən çox izlədiyim futbolçu Vinisiusdu”.

“Barselona”ya qarşı dubl
“Qranada”nın baş məşqçisi Pako Lopesi də dinləmək yerinə düşər: “Brayan kimi inkişafa meyl edən futbolçular azdı. Bütün oyunçular oynamaq, start heyətində meydana çıxmaq və 90 dəqiqə meydanda qalmaq istəyirlər. Amma Saraqosa gözəl başa düşür ki, uğur təkcə meydanda keçirdiyin dəqiqələrin çox olması sayəsində qazanılmır. O, özünü hər məşqə həsr edir və hər gün daha da güclü olmağa çalışır. Yaşı az olsa da, indidən karyerasında yüksəlişlər və enişlər olub. Amma Saraqosa həqiqətən mükəmməl futbolçudu”. Əsasən solda qərarlaşmasına baxmayaraq hər iki cinahda oynamağı bacaran Saraqosa gah birdən-birə sürət yığaraq, gah da əksinə birdən-birə dayanaraq müdafiəçilərin başını gicəlləndirir. Bəzi məqamlarda o hətta qarşısıalınmaz futbolçu təsiri bağışlayır. Brayanın populyarlığını artıran oyun oktyabrın 8-nə təsadüf etdi. Həmin gün “Qranada” 9-cu tur çərçivəsində öz meydanında “Barselona” ilə qarşılaşırdı. Brayan biri 17-ci saniyədə olmaqla ilk 29 dəqiqəyə dubl etdi və hər kəsi mat-məəttəl qoydu. Onun xüsusilə də ikinci qolu möhtəşəm alındı və bu futbolçu həmin epizodda ən güclü tərəflərini, yəni sürət, driblinq, soyuqqanlılıq və texnikanı nümayiş etdirməyə müvəffəq oldu. Boş zonaya sürətlə açılaraq topu qəbul edən istedadlı futbolçu həm Kundeni, həm də Ter-Ştegeni “bazara göndərərək” yaxın küncü dəqiq nişan aldı. Maraqlıdı ki, bu futbolçu artıq İspaniya yığmasında da debüt etməyə macal tapıb. Özü də “10” nömrəli forma ilə! “Barsa” ilə həmin qarşılaşmadakı dubldan bir neçə saat sonra Saraqosa ilk dəfə yığmaya dəvət aldı. Düzdü, onun adı ilkin siyahıda yox idi. Amma “Vilyarreal”lı Yeremi Pinonun zədələnməsi onun yığmaya yolunu açdı. Üstəlik “Basra”nın gənc ulduzu Yamin Lamal da eyni səbəbə görə yığmanın düşərgəsini tərk etdi. Saraqosa Şotlandiyaya qarşı ev oyununun (2:0) fasiləsində meydana daxil oldu. İspanlar hər iki qolu ikinci hissədə vursalar da, bu futbolçu qollarda yaxından iştirak etmədi. O yalnız ənənəvi driblinqlə “Mançester Yunayted”lı Skott Maktomineyin başını gicəlləndirməsi və “Everton”lu Neytan Pattersona sarı vərəqə “aldırması” ilə diqqət çəkdi. Noyabrdakı qarşılaşmalarda isə Saraqosa yığmaya dəvət almadı.

Riberinin davamçısı?
İndi ortaya sual çıxır ki, Saraqosa hücum xəttində onsuz da güclü rəqabət yaşanan və dünya səviyyəli futbolçulara malik olan “Bavariya”nın nəyinə lazımdı? Sane Keynin kölgəsində qalsa da, əla futbol sərgiləyir və karyerasının ən yaxşı mövsümünü keçirir. Heyətdə Koman və Qnabri kimi önəmli vingerlər də var. Lazım gəldikdə gənc Musiala da vinger mövqeyində oynamağı bacarır. Üstəlik bu oyunçulardan heç birinin müqavilə müddəti başa çatmaq üzrə deyil. Yalnız Sanenin müqaviləsi 2025-də bitəcək. Gənc ispaniyalının gəlişindən sonra ola bilər ki bu futbolçulardan biri ilə yollar ayrılsın. Və ya belə bir ehtimal da var ki, Saraqosa daha çox təcrübə toplaması üçün “Bavariya”ya gəldikdən sonra ilk mövsümdə başqa bir iddialı kluba icarəyə verilə bilər. Münhendə ona indidən Frank Riberinin davamçısı gözü ilə baxanlar da var. Yaxın keçmişdə “rekordmayster”də böyük iz buraxmış fransalı futbolçu da bəstəboy idi. Amma öz oyunu ilə fanatları valeh edirdi. Saraqosa da Riberi kimi sol cinahda oynamağa üstünlük verən sağ ayaqlı və güclü driblinqli vingerdi. Gələn mövsüm heyətə 164 sm-dən balaca futbolçu cəlb olunmasa, Saraqosa avtomatik Münhen nəhənginin ən bəstəboy futbolçusuna çevriləcək. Hazırda komandada bu statusda olan futbolçu Rafael Gerreyrodu. Portuqaliyalı cinah müdafiəçisinin boyu 170 sm-di.

ƏLİ RAUFOĞLU

P.S. Əsas suala da cavab verək. Saraqosa hələ ki, karyerasında “Saraqosa”ya qol vurmayıb. Baxmayaraq ki, ötən mövsüm sequndada bu komandaya qarşı hər iki oyunda meydana çıxmışdı...