Ulu Öndər Heydər Əliyevin anadan olmasının 100 illiyi ilə bağlı 19 yaşadək futzalçılardan ibarət millilərin qarşılaşacağını xəbər vermişdik.

Yığmamız AFFA-nın təşkilatçılığı ilə keçirilən beynəlxalq turnirdəki çıxışını başa vurdu. Xatırladaq ki, komanda noyabrın 26-da Belarusa güc gələ bilməmişdi. 1:3 hesablı məğlubiyyətin qeydə alındığı oyunda yeganə qol Mirzə Əmirov vurmuşdu. Millimiz növbəti matçda Mərakeşdən olan həmyaşıdlarıyla qarşılaşdı. Bakı İdman Sarayında keçirilən görüş də bizimkilərin məğlubiyyətiylə nəticələnib – 1:5. Ümumiyyətlə, yığmamızın durumu ürəkaçan deyil. İstər beynəlxalq yarışlardakı, istərsə də yüksək liqadakı nəticələr fiaskodu. Bu vəziyyət və yuxarıda bəhs etdiyimiz oyunlar ilə bağlı fikirlərini öyrənmək üçün baş məşqçi İlqar Aslanovla danışdıq.

- Beynəlxalq turnir, qarşılaşdığınız rəqiblər və keçirilən matçlar haqda fikirləriniz necədi?
- Yarış çox yaxşı təklif edilmişdi. Bu işdə əziyyəti olan hər kəsə təşəkkür edirəm. Hər iki oyunda məğlub olmağımıza baxmayaraq, böyük təcrübə qazandıq. Belə oyunlar gənc futzalçılara təcrübə qazanmaq baxımından çox vacibdi. Belə turnirlər tez-tez təşkil olunmalıdı və iştirak etməliyik. Belarus millisini tanıyırıq. Bir neçə dəfə qarşılaşmışıq. Xüsusilə avqustda Minskdə keçirdiyimiz görüş yadımdadı. 1:7 hesabıyla yenilmişdik. Bu dəfə sona yaxın qapıçını meydan oyunçusuyla əvəzlədik. Təəssüf ki, ani səhvimiz qolla nəticələndi və 1:3 hesabıyla uduzduq. Mərakeşlə matç da çətin oldu. Uşaqların var gücüylə mübarizə apardığına şübhə etmirəm. Reallıq odu ki, hər iki rəqib güclüdü. Xüsusilə Mərakeş son illərdə inkişaf edən komandadı.

- Məğlubiyyətlərin xüsusi səbəbləri varmı?
- Xeyli qol epizodu yaratdıq. Təəssüf ki, hələ də imkanlardan istifadə edə bilmirik. Rəqiblər texniki və taktiki cəhətdən bizi üstələdi. Düşünürəm ki, onlar iddialı komandaları belə məyus edəcək gücdədi. Həm Mərakeş, həm də Belarus yaxın illərdə futzalda söz sahiblərindən birinə çevrilə bilər.

- Uşaqların təcrübə qazandığını dediz. Son vaxtlarda hansı xüsusiyyətlərdə inkişaf görürsüz?
- Komandamda özünəinam artıb, əvvəlki oyunlarla müqayisədə irəliyə doğru addım atdıqlarını müşahidə edirəm. Əlbəttə, narazı qaldığım məqamlar da var. Bəzi hallarda texniki və xırda səhvlərə yol veririk. Bu problemləri aradan qaldırmalıyıq. Byenəlxalq matçlarda belə səhvlər daha tez özünü büruzə verir. Ona görə deyirəm ki, bu cür turnirlər təcrübə toplamaq, oyunçuların öz yaşıdlarıyla müqayisədə axsadığı məqamları üzə çıxarmaq baxımından çox əhəmiyyətlidi.

- Millimiz nəinki beynəlxalq turnirlərdə, heç yüksək liqada da özünü yaxşı tərəfdən göstərə bilmir. U-19-un inkişafına mane olan amillər hansılardı?
- Məncə, birini və ən əsasını desəm, bəs edər. Aşağı yaş qrupları yaradılmalıdı. Bu addımın atılması çox vacibdi. Bizə hazır futzalçılar gəlmir. İnanın ki, uşaqların çoxu bu sahəylə yeni tanış olur. Halbuki onlar daha əvvəldən məlumatlı olmalı, heç olmasa, ən sadə taktiki gedişləri bilməlidi. Komandam xüsusilə beynəlxalq turnirlərə hazır səviyyədə deyil.

KƏNAN BAHADIR