Yüksək Qızlar Liqasının 2-ci turunun "Neftçi" - "Balxurma" oyununda başverənlərdən xəbəriniz var. “Football-plus.az” xəbər verir ki, flaqmanın baş məşqçisi İbrahim Məmmədov hesab 23:0 olan zaman qarşılaşmanın bitirilməsini istəyib. Həmin vaxt görüşün 77-ci dəqiqəsi imiş. Bu məlumatı jurnalist Elsevər Muradzadə işıqlandırmışdı. Sonradan "ağ-qaralar"ın baş məşqçisi informasiyanı yalanladı. Həmkarımız isə AFFA İntizam Komitəsinin doğru qərar qəbul etməyəcəyi təqdirdə qurumdan UEFA-ya şikayət edəcəyini bildirdi. 

Məsələ ilə bağlı redaksiyamıza maraqlı informasiya daxil olub. Sən demə, İntizam Komitəsi hadisə ilə bağlı araşdırma başladıb. Oyunun protokolunda hakim matçın 90-cu dəqiqədə bitdiyini yazıb. Lakin mediada yazılanlar həm federasiya rəsmilərini, həm də İntizam Komitəsini narahat edib. Bu səbəbdən də məsələ ilə bağlı araşdırma başladılıb. 

Ümumiyyətlə, AFFA bu liqanı yola verir. Çünki federasiyanın rəsmi saytında oyunların keçirilmə yeri, vaxtı qeyd olunmur. Ümumiyyətlə, oyunlar barədə geniş məlumat əldə etmək mümkün deyil. Məsələn, qolları kim vurdu, matçın hakimi kimdi tipli informasiyaları tapmaq mümkün deyil. 

Təbii ki, belə olan halda İntizam Komitəsi hakimin protokolundakı qeydə inanacaq. Oyunun yayını olmayıb, arenadakı monitor işləməyib. Belə olanda qarşılaşmanın tez bitirilməsi ilə bağlı sübut əldə etmək olmur. Ən yaxşı halda oyunun görüntülərini AFFA-dan əldə etmək mümkündü. Görəsən, qurum bu informasiyanı media ilə bölüşər? Məhz bu düşündürü məqamdı. Gözləyək görək İntizam Komitəsi nə qərar verəcək...

İLKİN SULTANLI