“Məsələ De Byazinin gedib-getməməsindən çox, onu millidə kimin əvəz edə biləcəyidi. Tutaq ki, De Byazi getdi, yerinə başqa biri gəldi. Nə dəyişəcək? Seçmə mərhələlərdə 3 xal çox, ya da 3 xal az toplayacağıq. Bir halda De Byazinin getməsi sərf edər ki, yerli məşqçilərdən biri milliyə gətirilsin, daha az məvacib qarşılığında işləsin. Açığı, mənim milliyə, onun potensialına ümidim elə də çox deyil. De Byazinin jurnalistlər haqda dediklərinə gəlincə, həddini aşıb və milli komandanın baş məşqçisinə yaraşmayan ifadələr işlədib. Amma bizim media da bəzən reallıq hissini itirir, özlərini Azərbaycan yox, Argentina, Fransa millisindən nəticə tələb edən jurnalistlər kimi aparırlar".

"Təəssüf ki, AFFA-da və İcraiyyə Komitəsində oturan bir çox şəxslər - bura hamını daxil etmirəm - hansısa səbəbdən bir-iki oyunun nəticəsinə görə qərarlar vermək istəyirlər. Məsələn, İsveçə 3:0 qalib gəldik, De Byazi, afərin. Belçikaya səfərdə 0:5 uduzduq, De Byazi qovulmalıdı. Bir görüşün hesabına görə fikirlərin dəyişməsi düzgün deyil. İtaliyalı çalışdırıcının Azərbaycana gələndən sonra necə nəticələr qazandığına baxmaq lazımdı. Mən Bakıdakı oyundan sonra Rövnəq Abdullayevin açıqlamasına təəccübləndim. Deyir ki, gəlin, De Byazinin "fatihəsini verməyə” tələsməyək, Belçika ilə oyuna baxaq. Mən jurnalsit kimi orda olsaydım, buna cavab olaraq deyərdim ki, gedib Brüseldə Belçikaya qalib gəldik, axı nə dəyişəcək? Biz hər il yığmanın oyunlarını, qazandığı nəticələri görürük. Niyə “Belçikanı udsaq, baş məşqçi qalmalıdı” fikri olsun. Mənə görə, millimiz hazırda ciddi uğur əldə etməyə qadir deyil. Buna görə də hansısa mütəxəssisi dəvət edib, ondan nəticə tələb etməyin tərəfdarı deyiləm. Yəni tanınmış baş məşqçini bura gətirməklə nəsə olmayacaq. Düzünü desəm, mənə maraqlı gəlmir ki, yığmanı bundan sonra yerli və ya adlı-sanlı əcnəbi mütəxəssis çalışdıracaq. Aşağı yaş qruplarımıza diqqət ayırmaq lazımdı. Bu proseslər də bir neçə günə düzələn deyil. Hamı bilir ki, problem De Byazi yox, ölkə futbolunda buraxılan ciddi nöqsanların aradan qaldırmamasıdı. İtaliyalının Belçikadakı mətbuat konfransında jurnalistələr haqda səsləndirdiyi fikirlərə gəlincə, belə hal ilk dəfə baş vermir. Əvvəl də De Byazinin media nümayəndələri barədə bir sıra sözləri olub. AFFA bunun cavabını verməlidi. Ya da jurnalistlər ondan məhkəməyə şikayət etməlidi. Bundan sonra dövlət orqanları bununla bağlı qərar verəcək".