“Neftçi”nin qızlar komandası “Balxurma” ilə oyunu yarımçıq tərk edib?
Ölkə futbolunda hər gün bir maraqlı hadisə yaşanır. Bildiyiniz kimi, Azərbaycanda “AFFA Yüksək Qızlar Liqası” adlı çempionat keçirilir.
"Football-plus.az" xəbər verirki, burda 9 komanda iştirak edir. Bu kollektivlərdən ikisi Bakını (“Neftçi” və “Baku Juniors”), yeddisi isə bölgələri təmsil edir (“Sumqayıt”, “Araz-Naxçıvan”, “İnter” (Xaçmaz), “Qəbələ”, “Balxurma” (Balakən), “Aran” (Ağcabədi) və “Şəmkir”). Artıq çempionatda 2 tur oynanılıb. Şənbə günü “Neftçi” “Balxurma”nı qəbul edib. Qarşılaşma 23:0 hesabı ilə başa çatıb. Oyunda iştirak edən həmkarımız – “Pressing.az” saytının əməkdaşı Elsəvər Muradzadə şəxsi “feysbuk” hesabında oyun haqda maraqlı paylaşım edib:
“AFFA Yüksək Qızlar Liqasında "Neftçi" - "Balxurma" (Balakən) matçının 77-ci dəqiqəsində hesab 23:0 olarkən meydan sahiblərinin baş məşqçisinin istəyi ilə oyun yarımçıq dayandırıldı”.
Maraqlı hadisədi. Görəsən, “Neftçi”nin baş məşqçisi nə üçün belə addım atıb? Məsələ ilə bağlı fikirlərini öyrənmək üçün İbrahim Məmmədovla əlaqə saxladıq. “Ağ-qaralar”ın xanımlardan ibarət komandasının çalışdırıcısı qəzetimizə açıqlamasında bunları söylədi:
“Yazılanları mən də görmüşəm. Amma yalandı. Qarşılaşma tam 90 dəqiqə oynanılıb. Hesabda irəlidə olanda nə üçün belə addım atım ki? Bir daha deyirəm. Oyun 90 dəqiqənin tamamından başa çatdı”.
Məmmədov rəqibə bu qədər çox qol vurmalarının səbəbini də açıqladı:
“Bu çempionat oyunudu. Liqada çıxış edən kollektivlərin hamısı peşəkardı. Biz də rəqiblərimizi udmaq istəyirik. Meydana futbol oynamaq, qələbə qazanmaq və çox qol vurmaq üçün çıxırıq. Biz rəqiblərə rəhm etmək fikrində deyilik. Təsəvvür edin ki, “Neftçi”nin əsas komandası ilə “Qəbələ” üz-üzə gəlir. Onda kollektivlər bir-birinə güzəşt edəcək? Təbii ki, yox. Siz dediyiniz məsələlər ancaq uşaq liqalarında olur. Bu oyun U-9, U-10, U-11, U-12, U-13, U-14 liqalarında keçirilsə idi, 4-5 topdan sonra futbolçularıma vurmayın deyərdik”.
Baş məşqçi “Neftçi”nin çempionatdakı hədəflərindən danışdı:
“İlk turda meydana çıxmadıq. Bu həftə çempionatda 1-ci matçımızı keçirdik. Təbii ki, hədəfimiz çempionluqdu. Çempionatın ən yaxşı komandasıyıq. Çalışacağıq ki, sonda qalib gələk”.
İLKİN SULTANLI
Digər xəbərlər
