Bu gün Brüsseldəki “Edmond Machtens Stadium”da yığmamızın baş məşqçisi Canni de Byazi ilə kapitanı Emin Mahmudov mətbuat konfransı keçirdi.

Kapitan qısa danışdı, ona kimsə sual ünvanlamadı və getdi.

- Sabah dünyanın ən yaxşı komandalarından birinə qarşı oynayacağıq. Yaxşı nəticə qazanmağa çalışacağıq. Hamı 100 faiz gücünü qoysa, meydandan yaxşı nəticə ilə ayrıla bilərik.

Sonra De Byazi danışdı:

- Fikirləşirəm ki, bu gün qədər mərhələni yaxşı keçirmişik. Komanda bütün oyunlarda yaxşı təsir bağışlayıb. Keyfiyyət baxımından daha çox inkişaf etməliyik. Sabah da bunu təkrarlamalıyıq. Baxmayaraq ki, çox güclü komandaya qarşı oynayacağıq. Tedesko güclü komanda yaradıb. Fikirləşirəm ki, biz də artıq öz oyunumuzu tapmışıq. İsveçlə qarşılaşmanın bütün əvvəlki oyunlardan fərqi onda oldu ki, imkanlarımızdan yaxşı yararlandıq.

- Azərbaycanda ümumi fikir belədi ki, De Byazinin yığmanın baş məşqçi postundakı taleyi sabahkı oyunun nəticəsindən asılıdı. Siz də bu fikri bölüşürsüzmü?

- Sözün açığı, bu məsələ bu dəqiqə məni maraqlandırmır. Amma xahiş edirəm ki, bundan ağıllı suallar verin.

- Ramil Şeydayevin yoxluğunda Mahir Emreli start heyətində yer alacaqmı, həm də hücumun sivri ucunda?

- Sabahkı oyuna 24 saat və 25 dəqiqə qalıb, bir az səbriniz olsa, sabah görəcəksiz.

- Qazaxıstanın Sloveniya üzərində qələbəsindən sonra Azərbaycan pley-offa vəsiqə qazana bilər. Siz bu barədə nə düşünürsüz?

- Biz əlimizdən gələni etməliyik. Fikirləşirəm ki, bu bir qədər çətin məsələdi. Ancaq həyatda heç vaxt heç nəyə “yox” demək olmaz.

- İlk oyunda Belçikaya çətin anlar yaşatmışdız. Sabahkı oyun üçün nə hazırlamısız?

- Fikirləşirəm ki, sabah da eyni intensivlikli oyun göstərməliyik, taktiki cəhətdən Bakıdakı oyundakı kimi yaxşı oynamalıyıq. Və təbii ki, imkanlardan da yararlanmalıyıq. Bu rəqiblə Bakıdakı oyunda bu alınmadı. 6-cı dəqiqədə çox yaxşı imkanımız oldu, qol vura bilərdik. Səhər uşaqlarla həmin oyuna baxmışıq, rəqibdən çəkinmədik. Çox insanın problemi ondadı ki, hər şeyi nəticə ilə ölçürlər.

- Son mətbuat konfranslarına Emin Mahmudovla gəlirsiz. Mahmudovun komandanın uğur çubuğu olmasına münasibətiniz?
- Bunda qeyri-adi hal yoxdu. Emin komandanın kapitanıdı. Ondan xahiş edəndə həmişə razılıq verir.

- Albaniya yığmasız sizsiz də Avropa çempionatına vəsiqə qazandı. Həmkarınızı təbrik etdizmi?

- Bəli, hamısı ilə yaxşı əlaqələrim var. Məni orda çox sevirlər. İlk dəfə 2016-da qitə birinciliyinə qatıldılar. Albaniyanın çox yaxşı komandası var. Vacib oyunçularından yeddisi İtaliyada oynayır. Almaniya, Fransa, İspaniya, İngiltərədə oynayanları var.

HUŞƏNG, Brüssel