İspaniya çempionatının cari mövsümünün kəşfi olan əsas komanda “Jirona”dı.

"Football-plus.az" xəbər verir ki, son 5 oyunun hamısında qələbə qazanan kataloniyalılar hazırda turnir cədvəlinin zirvəsində qərarlaşıb. Miçel Sançesin komandası ən yaxın izləyicisi “Real”ı 2 xal arxada qoyur. “Jirona” ilk 13 turdan sonra artıq 34 xal toplayıb ki, bu da ötən mövsümdəki ümumi xal sayından 15 azdı. Jironalıların cari mövsümdə yeganə məğlubiyyəti “Real”la ev oyununda qeydə alınıb (0:3).

İspaniyalı həmkarlarımız La Liqanın lideri ilə bağlı çox maraqlı bir faktı üzə çıxarıb. Sən demə, komanda gündəlik məşqləri öz bazasında keçmir, Kaldes-de-Malavelyadakı PGA qolf mərkəzindən futbol meydanlarını icarəyə götürməyə məcburdu. İş ondadı ki, klub bu ilin sentyabrında Vilablaredə futbol kompleksinin tikintisinə başlamalı, gələn ilin əvvəlində isə ora köçməliydi. Ancaq jironalıların qonşuları bu layihə önündə “yaşıl işıq yandırmaq” istəmir, çünki yeni tikililərin ətraf mühitə necə təsir göstərəcəyi onlara izah olunmayıb.

“Ağ-qırmızılar”ın idman kompleksinin tikilməli olduğu ərazi Jironanın kənd təsərrüfatı düzənliyinə daxildi və xüsusi kənd təsərrüfatı təyinatlı torpaq kimi nəzərdə tutulub. Başqa sözlə desək, onun üzərində tikintiyə başlamaq üçün mülkiyyət formasını dəyişmək lazımdı. Ərazi şəhərsalma komissiyası işlənməmiş torpaqlar üçün xüsusi planı təsdiq və ya rədd etməlidi. Komissiya rədd etsə, klub yeni məşq bazasının tikintisinə başlamaq üçün lisenziya ala bilməyəcək.

Klub özü sakit olsa da, Fermerlər İttifaqı, Girona Təbiətşünaslar Assosiasiyası və “Vilablareni qoruyaq” hərəkatı artıq Ombudsmana və xüsusi komissiyaya lisenziyalaşdırma prosesində pozuntular barədə məlumat verib. Onlar hesab edirlər ki, yoxlama prosesi təkrarlanmalıdı. Üç strukturdan heç biri açıq müzakirədə təqdim olunan zəruri sənədlərlə tanış ola bilməyib. Belə görünür ki, “Jirona” ən azı bu mövsümün axırına qədər qolfçularla birgə yaşamalı olacaq.