“Dinamo”nun Cənubi Azərbaycandan olan məşqçisi nikbindi

Dünən 2-ci liqada 11-ci turun ilk oyunları keçirildi. “Dinamo” Novruz Əzimovun istefasından sonra “Şəfa” ilə oyuna Esmael Vakilighazijahaninin rəhbərliyi altında çıxmışdı. “Zolaqlılar” İbrahim Bağırovun 40-cı dəqiqədə meydandan qovulması üzündən azlıqda qalsalar da, Valeh Seyidovun 74-cü dəqiqədə vurduğu qol onlara qələbə qazandırdı. Oyundan sonra Cənubi Azərbaycandan olan məşqçiylə ayaqüstü söhbət etdik.

- Hazırda komandada vəziyyət necədi?
- Yaxşı. Əvvəl də pis ab-hava yox idi. Bəzi çatışmazlıqlar var idi ki, onları aradan qaldırdıq. İnşallah, 2-ci dövrədə daha yaxşı "Dinamo" görəcəksiz.
- Novruz Əzimov təcrübəli mütəxəssislərdəndi, amma ötən həftə istefa verdi. Novruz müəllim niyə çatışmazlıqları aradan qaldıra bilmədi?
- Novruz müəllim çox savadlı, zəngin təcrübəyə malik baş məşqçimizdi. Mən onun tələbəsi olmuşam. Ona görə də Novruz müəllimi qınamağa, tənqid etməyə heç bir haqqım yoxdu.
- Bugümkü oyunla bağlı fikirləriniz maraqlıdı...
- Gərgin və maraqlı görüş alındı. Qollar vurmaq üçün çox şansımız oldu. Son nöqtəni qoya bilsəydik, 4-5 qolla qalib gələcəkdik. 10 nəfərlə oynamağımıza rəğmən, xarakter göstərdik və əzmkar qələbə qazandıq.
- Rəqib baş məşqçi hakimlikdən narazı qaldı. Siz necə düşünürsüz?
- Hakimlikdən narazı qalmadım. Referilərin normal idarəçiliyini gördüm.
- Qarşıda daha iki oyun var, sonra 1-ci dövrə bitir. Bu iki matçdan gözləntiniz nədi?
- Bildiyiniz kimi, xal itkilərimiz çox oldu. Ona görə də 1-ci dövrəninn sonuna kimi maksimum çox xal toplamaq istəyirik. Qarşıdakı 2 turda 6 xala köklənmişik.
- 2-ci dövrə üçün artıq planlar cızmısızmı?
- Bəli. Çalışacağıq ki, 1-ci dövrədəki səhvlərimizi təkrarlamayaq. Ona görə də dövrəni başa vurandan sonra bütün matçlarımızı təhlil edəcəyik.
- Baş məşqçi kimi təsdiq olunmaq istərdizmi?
- Bu, klub rəhbərliyinə aid məsələdi. Yaşar Seyidov məni baş məşqçi postuna məsləhət bilsə, bunu özüm üçün böyük şərəf bilərdim.
- Bəs kənardan baş məşqçi gətirilsə, yenə köməkçi vəzifəsində qalacaqsızmı?
- Mən özümü "Dinamo"nun əsgəri sayıram. Hansı vəzifəyə təyin ediləcəyimdən asılı olmayaraq, işimi can-başla yerinə yetirəcəm.
- Arazın o tayından olan azərbaycanlıları "Dinamo"ya cəlb etməyi düşünürsüzmü?
- Biz yalnız futbol oynamaq yox, həm də ölkə futboluna oyunçular qazandırmaq istəyirik. Cənubi Azərbaycandan 18-20 yaş arası potensiallı gəncləri klubumuza cəlb edə bilərik. Məqsəd gələcəkdə onları Azərbaycan millisinə qazandırmaqdı.
- Gözaltı etdiyiniz oyunçular varmı?
- Bəli.

ABDULLA İSMAYILOĞLU