“İmişli”nin üzvü Tonia Tisdelin “football-plus.az”a müsahibəsi...

- 1-ci liqanın 8-ci turunda səfərdə “Karvan”la heç-heçə (1:1) etdiz. Görüş haqda nə deyə bilərsən?
- Maraqlı görüş oldu. Yaxşı mübarizə apardıq. “Karvan” çempionatın əla komandalarındandı. Yaxşı futbolçuları, məşqçiləri, oyun tərzləri və ən əsası da azarkeşləri var. Onlarla mübarizədə 1 xal qazandıq. Növbəti görüşlərdə qələbə qazanmağa çalışacağıq.

- Oyunu sona kimi davam etdirə bilmədin. Zədən haqda nə söyləyə bilərsən?
- Hazırda özümü yaxşı hiss edirəm. Hər şey qaydasındadı. Oyun zamanı ayağımdan zərbə aldım. Ağrı davam etməyimə imkan vermədi. Düzdü, oynamaq istəyirdim. Lakin ağrı dəhşətli idi. Bu səbəbdən də oynaya bilmədim. İndi hər şey qaydasındadı. Narahatlığa əsas yoxdu.

- “İmişli” çempionatın favoritlərindən hesab olunur. Yekunda qalib olmaq potensialındasız?
- Əlbəttə! Komandada yaxşı futbolçular var. Baş məşqçimiz ölkənin ən yaxşılarından biridi. Klub rəhbərliyi hər cür şərait qurub. Sadəcə, oynayaraq qələbələr qazanmalıyıq. Əsas hədəfimiz premyer-liqaya vəsiqə qazanmaqdı.

- İmişlidə yaşamaq sənin üçün çətin deyil?
- Mən bura futbol oynamağa gəlmişəm. Mənə şəhərdəki vəziyyət o qədər də maraqlı deyil. Əslində hər şey qaydasındadı. Yaxşı bazamız var. Stadionumuz normal vəziyyətdədi. Hər şey yaxşıdı. Futbol üçün əla şərait varsa, niyə də İmişlədi oynamayım?

- Fikir vermişəm, azarkeşlər səni çox sevirlər. Bu, nə ilə bağlıdı?
- Səbəbini bilmirəm. Mən də burdakı azarkeşləri sevirəm. Düşünürəm ki, oyunlar zamanı meydanda əlimdən gələni edirəm. Komandamın qələbə qazanmasını istəyirəm. Təcrübəmdən istifadə edərək yaxşı oyun sərgiləməyə çalışıram. Ola bilər ki, bunlar azarkeşlərin sevgisini qazanmağına səbəb olub.

- Liberiya millisinə dəvət olunmusan. Yığmanın baş məşqçisi sənin oyunlarını izləyir?
- Uzun müddətdi ki, Liberiya millisində çıxış edirəm. Hər oyundan sonra yığmanın baş məşqçisi mənimlə əlaqə qururdu. Əlimdən gələni edəcəm ki, Azərbaycanda 1-ci liqanın səviyyəsinin yüksək olduğunu millinin oyunlarında göstərə bilim.

İLKİN SULTANLI