"Ağsu Difai"nin prezidenti Asəf Məlikovun "football-plus.az"a müsahibəsi...

- 1-ci liqanın 8-ci turunda Ağsuda "Mingəçevir"ə məğlub olduz. Komanda hələ qələbə qazanmayıb. Nə baş verir?
- Yeni komandayıq. Burda hər şey ola bilər. Yeni komandayıq. İdman mübarizəsində iştirak edirik. Burda qalibiyyət də, məğlubiyyət də ola bilər. Uduzmaq normal bir şeydi.

- Yəqin ki, qışa kimi yeni baş məşqçi Elgiz Kərimliyə vaxt vermisiz. Bu müddət ərzində komanda toparlana biləcək?
- Hər bir komanda kimi bacardığımız qədər xal yığmalıyıq. Sən vurmasan, sənə vuracaqlar. Bu, futbolda aksiomadı. Ona görə də özümüzə gəlməli, toparlanmayıq. Əlimizdən gələni etməliyik ki, qışa qədər indiki mövqeyimizdən qurtulaq.

- Əldə etdiyimiz məlumata görə, yanvarın 1-dən Ağsu Şəhər Stadionu təmirə bağlanacaq. Bu haqda ətraflı məlumat verməyinizi istərdik...
- Vallah, biz bu stadionu AFFA-dan icarəyə götürmüşük. Yəqin ki, bizə alternativ arena verərlər. Ya da ki, özümüz axtarıb taparıq. Hazırda harda oynayacağımızla bağlı bizə məlumat verilməyib.

- Təmirlə bağlı nə deyə bilərsiz?
- Ümumiyyətlə, bizə bu barədə nəsə deyilməyib.

- Komanda çempionata pis başlayıb. Nəticələr ürəkaçan deyil. Sizin bu mövsüm üçün ümidiniz nəyədi?
- Maksimum nəticə əldə edək və komanda olaraq tam formalaşmaq. İrəliləmək, böyümək istəyiriksə, infrastruktur yaradılmalıdı. Biz bu işləri paralel şəkildə edirik. Əsas məqsədlərimizdən biri uşaq futbolu ilə bağlıdı. Bildiyiniz kimi, bu mövsüm 1-ci liqada iştirak etmək hüququ əldə etmişik. Bizə Ağsunu təmsil etmək təklif olundu. Bundan sonra uşaq futbolu ilə bağlı planlarımızı da Ağsuya uyğunlaşdırdıq. Aşağı yaş komandalarımız da bu rayonu təmsil edir.

- Belə başa düşdüm ki, Ağsuda akademiya da tikmək haqda plan qurursuz?
- Artıq 14 yaşadək futbolçularımız AFFA-nın təşkil etdiyi çempionatda iştirak edir. 9-10 yaş qrupu üzrə komandalarımız Mingəçevirə yollanmışdı. Yoldaşlıq oyunu keçirirdi. Məqsədimiz bu tip komandalar formalaşdırmaqdı.

- Sanki "Difai Ağsu" ağsululara özünü sevdirə bilməyib. Çünki "Mingəçevir"lə oyunda stadion boş idi. Bu yöndə hansı addımlar atmağı düşünürsüz?
- Bu məsələ bizi ciddi narahat edir. Artıq fanklubumuz fəaliyyətə başlayacaq. Komandanın məşqlərinə gəlirlər. Ağsuda tanınan, sevilən və azarkeş kütləsi olan klub olmaq arzusundayıq. Bu yöndə işlər görürük.

İLKİN SULTANLI