"Şahbaz Şahbazov çox istedadlı oyunçudu. Bizim klubun yetirməsidi. Onu üç il əvvəl Ələt qəsəbəsində kəşf etdim. Məşqlərdə o qədər istəkliydi ki, hər məşqdə, oyunda 10 qat “artırırdı”. Yeniyetmələr var ki, futbol məktəbinə gəlir və 7-8 il sonra potensialı üzə çıxır. Amma Şahbaz günbəgün “artırırdı”. Təsəvvür edin ki, o hər məşqə gəlmək üçün 160 km məsafə qət edirdi. Valideynləri də sağ olsun, onun futbolçu olması üçün əlindən gələni etdilər. Belə istedadlı futbolçunun daha da inkişaf etməsi üçün Avropaya getməsinin vacibliyini anladım. Şükürlər olsun ki, Avropada, Asiyada tanış menecerlər var. Onlarla danışdım və Şahbazın İspaniyada oynamasını qərara aldıq. Futbolçumuz Bakı kəndlərinin çempionatında, "Sabahın ulduzları" turnirində və həvəskar liqada çıxış edib. O, həvəskarların çempionatında 9-10 oyuna 17 qol vurmağı və assistlər etməyi bacardı. Həmin vaxt Şahbazın 15 yaşı vardı. Ona bacardıqca daha çox şans verdim ki, özünü göstərsin. Sonuncu dəfə 2007-ci il təvəllüdlülərin çempionatında da özünü yaxşı tərəfdən göstərdi. Qollar vurdu, assistlik etdi. Nə qədər acı olsa da, bunu deməliyəm. Bizim ölkədə bir çox istedadlı uşaq 17 yaşdan sonra sıradan çıxır. Ya zədəyə, ya əsgərliyə getdiyinə, ya da başqa səbəblərə görə futboldan uzaqlaşır. Həmçinin xaricdəki futbol məktəblərinin uşaqları tez-tez beynəlxalq turnirlərdə iştirak etdiyi halda, bizdə belə hallar az olur. Bu da təbii ki, uşaqların potensialının üzə çıxması yolunda əngəllərdəndi. Odu ki, Şahbazın İspaniyada da özünü doğruldacağına inanır və uğurlar arzulayıram. Komandamızın direktoru Mehman Əlimova da dərin təşəkkürümü bildirirəm. Mehman müəllim bizim üçün əkindən gələn hər şeyi edir. Həmçinin qeyd edim ki, vaxtilə tələbəm olan Akaki Kvernadze də İspaniya klublarında məşqçi kimi çalışır. Eləcə də "Qəbələ"də futbola başlayan, sonra bizdə çıxış edən 2005-ci il təvəllüdlü Rəsul Məmmədov İspaniyada çıxış edir. Bacardıqca potensiallı futbolçularımızı üzə çıxarıb Avropaya göndərməkdə, onların daha da inkişafında maraqlıyıq".