Cari mövsümdə ilk məşqçi istefası bazar günü yaşandı.

Azər Məmmədov köməkçiləri ilə birgə “Kəpəz”lə yolları ayırdı. 1-ci dövrədən sonra bu gediş gözlənilirdi. Gəncəli mütəxəssis düşünürdü ki, qış fasiləsinə kimi komanda yenə sonuncu olsa, istefa verəcək. Lakin hadisələr çox tez cəraəan etdi. Bu yazıda Azər Məmmədovun istefasının səbəblərini izah etməyə çalışacam.

Qurban Qurbanov güzəşt etmədi

Hamıya bəllidi ki, şənbə qarşılaşması Tovuzda keçirilməliydi. Amma Ağdam təmsilçisi həm PFL-ə, həm də “Kəpəz”ə müraciət edərək matçın yerinin dəyişdirilməsini xahiş edib. Çünki “köhlən atlar” Avropa Liqasının qrup mərhələsində “Bayer-04”lə qarşılaşacaq. Yol yorğunluğunun olmaması üçün ağdamlılar belə tələblə həm kluba, həm də quruma müraciət etmişdi. “Kəpəz” bundan imtina edə bilərdi. Lakin “Qarabağ”ın avrokuboklarda yeganə Azərbaycan təmsilçisi olması gəncəlilərin güzəştə getməsini şərtləndirdi. Xatırlayırsızsa, bu mövsümün əvvəlində, ilk turda “Neftçi” də Gəncəyə getməmək üçün “sarı-göylər”ə eyni təkliflə müraciət etmişdi. Lakin gəncəlilər bunu qəbul etməmişdi. Onda “Neftçi” Türkiyə nəhəngi “Beşiktaş”la üz-üzə gələcəkdi. Həmin vaxt da Azərbaycan futbolu naminə nəsə etmək olardı. Lakin “Neftçi”yə “yox” deyən gəncəlilər “Qarabağ”ın sözündən çıxmadı. Çox güman, bu məsələdə Qurban Qurbanov amili, yəni Azər bəyin “Qarabağ”ın çalışdırıcısına hörməti böyük rol oynadı. Amma “Qarabağ”ın baş məşqçisi bu jestə eyni şəkildə cavab vermədi. Gəlin, etiraf edək ki, “köhlən atlar” indiki məqamda “Kəpəz”i daha böyük hesabla da məğlub edə bilər. Ağdamlıların “sarı-göylər”ə qarşı, demək olar ki, əsas heyətlə çıxması maraqlı gediş idi. Düşünmək olar ki, Qurban Qurbanov futbolçularını “Bayer-04”lə oyuna hazırlaşdırırdı. Amma ağdamlıların çalışdırıcısı fasilədə komandasına “Kəpəz”in və ya Azər Məmmədovun incə jestinə görə “daha qol vurmayın” deyə bilərdi. Baş məşqçi məhz 1:7 hesablı məğlubiyyəti özünə sığışdırmayaraq istefa verdi.

Yeni transferlər fiaskodu

“Qarabağ”a məğlubiyyət, sadəcə, bəhanədi. Belə baxanda “köhlən atlar” yaxşı edib. Zəif komanda düşdü qarşılarına, sağdan, soldan, mərkəzdən döşədilər. “Bayer-04” Almaniyada “köhlən atlar”a güzəşt etdi? Dünyanın qaydası belədi: güclülər həmişə zəifləri tapdalayır!
Bəs “Kəpəz” niyə bu gündədi? Gəncənin futbol ictimaiyyəti arasında çox populyar olan bir fikir var ki, öz şəhərlərindən olan məşqçi komandanı ağ günə çıxaracaq. Axırı necə oldu? Hamınız bilirsiz. Komanda indi uçurumun dibindədi. Şuaybu xəstə ola-ola, meydana çıxıb. Meneceri bu məsələdə hansısa mülahizələr əsasında prinsip aparmasaydı, daha böyük fəlakətlər yaşana bilərdi. Yeni transfer edilən yerlilər və əcnəbilər fiaskodu. Həmin futbolçuları ki, klub rəhbərliyi tapıb, müqavilə imzalayıb. İlqar Nadiri bütün açıqlamalarında “Kəpəz”ə dəstək lazım olduğunu bildirir. Adam 3 ildən çoxdu ki, klub ətrafında gəzən söz-söhbətləri aradan qaldıra bilmir. Mediada yazılanlara inansaq, təmirə bağlanan Gəncə şəhər stadionundan kimlərsə oğurluq edib. Belə nəzarət olar? Məhz şəristəsiz idarəçilik Azər Məmmədovun istefasının şərtləndirirdi. Böyüklərin səhvini ört-bastır etmək üçün kiçiklər qurban getməliydi.

Azər Məmmədovun səhv qərarı

Mütəxəssis indiyə kimi ancaq köməkçi məşqçi kimi çalışmışdı. Onun “Kəpəz”ə əsas fiqur kimi gəlməsi düzgün qərar deyildi. Bəli, özü də qeyd edir ki, təklifi qəbul etməsəydi, doğru olmazdı. Bəlkə də insan özünü isbat etmək istəyib. Buna görə Azər Məmmədovu qınamaq olmaz. “Kəpəz” 1-ci divizionda olan zaman komandaya baş məşqçilik etsəydi, indi ölkə futbolu üçün yaxşı mütəxəssis yetişərdi. Lakin Azər bəy hisslərinə qapılaraq gələcək karyerasına zərbə vurdu. Çünki Gəncədə çalışmaq, “Kəpəz”i idarə etmək onun potensialı xaricindədi. Bütün bu məqamları bir yerə yığanda Məmmədovun istefasının səbəbi aydın olur. Amma ən əsas məqam gəncəli mütəxəssisin “Qarabağ”a bu hesabla məğlubiyyəti qəbul edə bilməməsi oldu. Bəlkə də başqası olsaydı, qış fasiləsinə kimi dözərdi...

İLKİN SULTANLI