"Nəticə ikinci plandadı"
Misli premyer-liqasında 12-ci tura start verilib.
"Football-plus.az" xəbər verir ki, açılış matçında "Səbail" "Turan Tovuz"u məğlub edib - 2:1. Oyundan sonra paytaxt təmsilçisinin çalışdırıcısı Şahin Diniyevin mətbuat konfransı keçirilib. Sizi onun fikirləri ilə tanış edirik:
"Çox gərgin, dramatik oyun idi. Komanda xarakter göstərdi. Nəticə ikinci plandadı. Əsas futbolçular sağlam olsun. İlk yarıda oyun "Turan Tovuz"un, ikinci hissə bizim tərəfimizdə idi. İlk yarıda futbolçular panikadaydı, ritmdən düşmüşdülər. Fasilədə sakit formada danışdıq. Bunu bacardıq. Beyin sakitləşəndən sonra bədən istədiyini edə bilir. Fasilədən sonra çox yaxşı oynadıq. "Turan Tovuz" da yaxşı oynadı. Gözləməzdim ki, ilk yarıda belə aqressiv olarlar. Onlara uğurlar arzulayıram. Komandama təşəkkür edirəm ki, döyüşdülər, özlərində güc tapdılar. Bir çox qol epizodlarımız da var idi. Layiqli qələbə qazandıq, təsadüfən yox. 12-ci turdu, hər oyunda qol vurmağa çalışırıq. Hücumda çoxluq varsa, müdafiədə azlıqda qalmağa məhkumuq. Çox qol buraxmağımız da bununla bağlıdı".
- Bir oyunda üç futbolçunu itirmək karyeranızda olub?
- Həm də əvəzetmələrimiz bitmişdi. Hər biri də əsas oyunçularımızdı. Müdafiədə itkilərimiz çoxdu. Gözləyirik ki, ikinci dövrə tez bitsin və buna əncam çəkək. Limitə düşənləri itirmək olduqca çətindir. Karyeramda belə gərgin, xarakterli, itkili, dramatik oyun olmayıb. Yadıma gəlmir belə oyun.
- Sizcə, Səlahət Ağayevə sarı, yoxsa qırmızı vərəqə verilməli idi?
- Hakim VAR-a baxanda mən də baxdım, top dizinə dəydi, sonra əlinə. Başına dəyib, əlinə dəyirsə, sarıdı. Dərhal əlinə dəysəydi, qırmızı vərəqə olacaqdı.
- Ayxan Abbasov hakimlikdən narazı qalıb. Sizcə, hakimlik hansı səviyyədə idi?
- Bütün həmkarlarımın fikirlərinə hörmətlə yanaşıram. Belə məğlubiyyət üzücüdü. Hərənin bir baxışı var. Ona da hörmətlə yanaşıram.
Digər xəbərlər
