“Oktyabrın 31-də 2-ci liqanın 9-cu turunda “Göygöl”lə “Sheki City” arasında keçirilən oyunda xoşagəlməz hadisələr yaşanıb və klubumuz bundan zərər çəkib. Başverənlərə etiraz etdiyimizi bəyan edir, məsələnin araşdırılaraq doğru qərarlar veriləcəyinə inamımızı bildiririk. Belə ki, 80-ci dəqiqədə hakimin ədalətsiz qərarına etiraz edən futbolçumuz Vüqar Əşrəfliyə qırmızı vərəqə verilib. Vüqar meydançanı tərk edərkən hakim Rövşən Rəcəbov onu təhqir edib, idmançı şərəf və ləyaqətini alçaldan ifadələr işlədərək münaqişəyə təhrik edib. Bundan sonra tərəflər arasında mübahisə başlayıb. Hakim Rövşən Rəcəbov oyun zamanı asayişdən məsul olan polis əməkdaşlarının təhlükəsizliyi təmin edə bilməməsini iddia edərək oyunu yarımçıq saxlayıb. Ədalət təmsilçisinin qeyri-adekvat hərəkətləri, oyunu yanlış idarə etməsi, daha doğrusu, idarə edə bilməməsi, kobud səhvlərə yol verməsi, səriştəsizliyi səbəbindən matçı yarıda buraxmasını nəzərə alaraq, bu şəxsin cəzalanması və matçın yenidən təşkil edilməsinin vacibliyini qeyd edir, bununla bağlı açıq ictimai müraciətimizi bildiririk. Məsələ ilə bağlı Azərbaycan Futbol Federasiyasları Assosiasiyasına (AFFA) rəsmi yazılı müraciət ediləcək.

Oyunun əvvəlki dəqiqələrində də hakimin qərəzli qərarlar verməsinin şahidi oluruq. Onun matçda sarı və qırmızı vərəqələrdən yanlış və qərəzli şəkildə istifadəsindən və vəzifə səlahiyyətlərindən istifadə edərək Azərbaycan Respublikasının sərhədləri çərçivəsində qadağan edilən mərc platformaları ilə əməkdaşlıq çərçivəsində qeyri-qanuni gəlir əldə etməsindən də şübhələnirik.

Son dövrlərdə Azərbaycan futbolunda aparılan islahatlara kölgə salan halların yolverilməz olduğunu, məsələnin AFFA İntizam Komitəsi tərəfindən nəzarətə götürülməsini xahiş edir, ədalətli qərar veriləcəyinə inamımızı bildiririk. “Göygöl” daim ədalət tərəfdarı olub, bütün addımlar zamanı ilk öncə dürüstlük, idman prinsipləri, layiqli oyun nümayiş etdirilməsini istəyib. Futbolçularımızın öncəki matçlarda da qırmızı vərəqə aldığı məqamlar olub, bunu təbii qiymətləndirərək heç bir etiraz etməmişik. Lakin qərəzli halların ardıcıl baş verməsinin üzücü bir tendensiyaya çevrilməsi bizi narahat edir. Məsələ ilə bağlı videofaktlar klubumuz tərəfindən aidiyyati üzrə təqdim etmək üçün hazırdı. Sonda heç vaxt qalmaqallarda, hakimlər və ya rəqiblərlə problemlərdə adı hallanmayan klubumuzun şərəfli yolunu əvvəlki kimi davam etdirəcəyini bildiririk”.

“Hadisənin səbəbləri və oyunun yarımçıq qalması barədə araşdırmalarımız davam edir. Proses başa çatandan sonra İntizam Komitəsi məsələ ilə bağlı qərar verəcək”.

“Bildiyiniz kimi, 2-ci liqa bu ildən keçirilir, yəni yeni liqadı. Bütün liqalarda olduğu kimi, burada da təhlükəsizlik məsələləri bizim üçün çox önəmlidi. Dünən (srağagün – red.) Göygöl Olimpiya İdman Kompleksində keçirilən “Göygöl” – “Sheki City” matçı baş hakim Rövşən Rəcəbovun qərarı ilə yarımçıq dayandırılıb. Oyunun həm baş hakim, həm də AFFA nümayəndəsi tərəfindən yazılmış raportunu əldə etmişik. Eyni zamanda Peşəkar Futbol Liqasının oyunla bağlı çəkilişi var. Məlumat üçün bildirək ki, PFL-in 2023/24-cü illər üçün əsasnaməsində belə halların tənzimlənməsi ilə bağlı bəndlər var. Baş hakimin fikrincə, oyuna futbolçuların, rəsmi şəxslərin və kənar şəxslərin müdaxiləsi varsa, matç yarımçıq dayandırıla bilər. Eyni zamanda vurğulamalıyıq ki, belə hallara görə yarımçıq dayandırılmış oyunlar yenidən keçirilmir. Oyunla bağlı müvafiq qərarların verilməsi müvafiq şəxlərin raportlarına əsasən AFFA İntizam Komitəsinə həvalə olunur. PFL əsasnamənin tələblərinə uyğun olaraq bütün prosedurları həyata keçirir və lazımi sənədlər AFFA İntizam Komitəsinə verilir”.

“Göygöl”ün iddialarıyla razı deyilik. Hakim tərəfkeşlik etmədi, əksinə, qərarların ədalətli olduğuna inanırıq. Dərinə getsək, ilk qırmızı vərəqə bizə verildi. Azlıqda qalmağımıza baxmayaraq, yaxşı oyunla hesabda önə keçdik. Biz rəqibi üstələdikcə aqressiv çıxış etməyə, hakimin hər qərarına sərt etiraz bildirməyə başladılar. Onlar qayda pozuntularına görə cəzalandı. İki futbolçusu simulyasiya etmək istəyirdi, lakin alınmadı. Belədə “sarı” verilməlidi də, başqa nə etmək olar? Oyun davam etsəydi, “Göygöl”ün hələ çox futbolçusu “qırmızı” alacaqdı. Bizdə matçın videosu var, diqqətlə baxıb təhlil etmişik. Hər şey qaydalara uyğundu. Rəqibin niyə belə davrandığını isə anlamırıq. AFFA İntizam Komitəsinin ədalətli davranaraq, bizə texniki qələbə verəcəyini düşünürük. “Göygöl”ə növbəti sınaqlarda uğurlar arzulayırıq, lakin təmkinli olsalar, daha yaxşıdı. Hər kəs ölkə futbolunun inkişafını istəyir. Məhz 2-ci liqa da bu məqsədlə yaradıldı. Nə klubumuzun, nə də turnirin belə xoşagəlməz hallarla gündəmə gəlməsini dəstəkləyirik. Öz növbəmizdə “Futbol+”ə də təşəkkür edirik ki, bizə tribuna verir və hər kəsin fikrinə hörmətlə yanaşır”.