Fariz Yusifov: “Samir Abasov belə ifadəni ağzına almamalıydı"
Misli premyer-liqasının 10-cu turunun “Sabah” – “Sumqayıt” oyunu ilə bağlı bütün detalları ötən sayımızda təqdim etdik.
Xatırladaq ki, “kimyaçılar”ın baş məşqçisi Samir Abasov oyunboyu qəzəbli görünür, emosional şəkildə futbolçularına tapşırıq verirdi. 2-ci hissədə, daha dəqiq desək, Masazır təmsilçisi hesabı bərabərləşdirdikdən (1:1) 3 dəqiqə sonra baş hakim Nicat İsmayıllı mütəxəssisə sarı vərəqə göstərdi. Cəza çalışdırıcını sakitləşdirmək əvəzinə daha da özündən çıxardı. Başverənlərə media sektorundan şahidlik etdiyim üçün görüşdən sonra keçirilən mətbuat konfransında Samir müəllimə belə dedim:
“Deyəsən, hakimin sizə sarı vərəqə verməsindən narazı qaldız”.
Baş məşqçinin cavabı isə gözlənilməz idi:
“Hakimlər gestapoya çevrilib, hər sözə sarı vərəqə verilir. Məşqçi sözünü deməlidi. Biz də oyunun içindəyik. Sizin fikriniz nədi? Bəzi şeylərdə güzəşt olmalıdı. Bilirəm, öz işlərini rahatlaşdırmaq üçün edirlər. Lakin ümumilikdə hakimlik pis deyildi. Sarı vərəqə nə birincidi, nə də axırıncı olacaq. Normaldı”.
Burda diqqətçəkən məqam məhz “gestapo” sözüdü. Qeyd edək ki, bu, Adolf Hitlerin məxfi polisinin birləşdiyi təşkilatın qısaldılmış (“Die Geheime Staatspolizei”) adıdı. Qurum Almaniyada istənməyən millət nümayəndələrinin ələ keçirilməsi, müxaliflərin və casusların dəhşətli sui-qəsdlə yox edilməsiylə məşğul olub. Əliqanlı təşkilat lideri Henrix Himmlerin intiharı və Adolf Hitlerin aradan çıxmasıyla başıboş qalır və bir müddət sonra dağılır. Görəsən, ölkəmizdəki hakimlərin fəaliyyətini bu sözlə qiymətləndirmək nə dərəcədə doğrudu? Həqiqətən hakimlər qatillərlə eyniləşdirilə bilər?
Bu suallarla veteran hakim Fariz Yusifova müraciət etdik. Onun"Football-plus.az"a söylədikləri:
“İmkan daxilində premyer-liqa oyunlarını izləyirəm. Görürəm ki, matçlar əsasən gənc nəsildən olan hakimlərin idarəçiliyi altında keçirilir. Düzdü, bəzi səhvlər nəzərə çarpır. Lakin hər biri oyun qaydalarından kənara çıxmamağa, ədalətli qərarlar verməyə, dəqiq olmağa çalışırlar. Samir Abasov isə belə ifadəni ağzına almamalıydı. Bəlkə də “gestapo” sözünün mənasını bilmir. Ümid edirəm ki, belə olar. Yoxsa çox pis. Azərbaycan kimi qalib ölkənin vətəndaşı ənənəsi olan hakimlik məktəbimiz haqda belə danışmamalıdı. Samir qardaşıma arzulayıram ki, hansısa ifadədən istifadə edəndə daha diqqətli olsun. Baş məşqçilərə mətbuat konfranslarında danışarkən çox düşünməyi tövsiyə edirəm. Belə sözlərin arxasında durmaq lazımdı. Bacarmayacaqlarsa, bu tipli fikirlər səsləndirilməsin. Gənc hakimlərə isə uğur arzulayıram”.
KƏNAN BAHADIR
Digər xəbərlər
