“Guya yeni tikilən evə köçəndə hər şey mükəmməl olur?” – Nadiq Quliyev
Prezident İlham Əliyevin bazar ertəsi Mehdi Hüseynzadə adına Sumqayıt şəhər stadionunda yaradılan şəraitlə tanış olduğunu bilirsiz.
Diqqətçəkən məqamlardan biri “Sumqayıt”ın ev oyunlarını burda keçirib-keçirməyəcəyidi. Stadionun şəhərin İcra Hakimiyyətinin balansında olduğunu yazmışdıq. Bu üzdən klub oyunlarını burda keçirə bilmək üçün dövlət qurumuyla danışıq aparmalıdı. Görəsən, müzakirələr başlayıbmı? İcra hakimiyyəti kluba razılıq vermək niyyətindədi?
Suallarımızı “Sumqayıt”ın mətbuat xidmətinin rəhbəri Zaur Xudiyevə ünvanladıq. Klub rəsmisi bu yöndə ilkin addımın atıldığını açıqladı:
“Stadion istifadəyə hazırdı. İndi ev oyunlarını burda keçirə bilmək üçün İcra Hakimiyyətiylə danışıqlara başlamışıq. Qarşı tərəflə müzakirələr müsbət yekunlaşsa, stadionda bəzi xırda düzəlişlər etmək lazım olacaq. Əvvəlcə bu məsələ həllini tapmalıdı. Premyer-liqa, kubok və başqa oyunları burda keçirmək istəyirik”.
Aydın olur ki, “gənclər şəhəri” təmsilçisi hazırda bu yöndə yerli İcra Hakimiyyəti ilə müzakirə aparır. Lakin dövlət qurumunun razılığı məsələnin həll olunması demək deyil. PFL də bu işə “hə” deməlidi. Bəs PFL rəsmiləri stadionun durumuyla tanış olub? Arena futbol qurumunun tələblərinə uyğundu? PFL-in Media və Marketinq direktoru Sənan Abdullayev hələ ki bu məqsədlə Sumqayıta səfər etmədiklərini dedi:
“Ora ilk səfərimiz tikinti mərhələsində olub. Daha sonra getməmişik. Hələ ki “Sumqayıt” ev oyunlarını həmin stadionda keçirmək istəyi ilə bağlı bizə rəsmi müraciət etməyib. Özləri istədiyi halda məsələyə baxıla bilər”.
"Football-plus.az"a daxil olan məlumata görə, “Sumqayıt”ın arzusu yaxın zamanlarda reallaşmayacaq. Çünki stadion premyer-liqanın tələblərinə uyğun tikilməyib. Daha dəqiq desək, İcra Hakimiyyəti idman qurğusunu kluba versə belə, PFL çoxlu dəyişikliklər tələb edəcək. Burda iki mövzu gündəmə gəlir. Birincisi, İcra Hakimiyyətinin icarəhaqqı kimi klubdan çox yüksək məbləğ tələb etdiyi məlumdu. Çünki arenanın “Sumqayıt”a verilməsi planlaşdırılmır. “Kimyaçılar” idman qurğusunu, sadəcə, icarəyə götürə bilər. Bu üzdən klubla İcra Hakimiyyəti arasındakı danışıqlar dalana dirənib.
Görünür, İcra Hakimiyyəti stadionu saxlamaq üçün lazım olan vəsaiti klubdan qoparmaq niyyətindədi. İkincisi, stadionun əlverişsiz şəraitdə olmasıdı. Belə ki, arenanın işıqlandırma sistemində problemlər var. İnzibati otaqlar, paltardəyişmə yerləri, hamam plansız hazırlanıb. Xüsusilə axşam saatlarında burda oyun keçirmək mümkünsüzdü. Qeyd olunan çatışmazlıqlarla bağlı fikirlərini öyrənmək üçün Mehdi Hüseynzadə adına Sumqayıt şəhər stadionunun direktoru Nadir Quliyevə müraciət etdik. Maraqlıdı ki, o, bu iddialarla razılaşmadı:
“Arenada demək olar ki, hər şey qaydasındadı. İddialar həqiqəti əks etdirmir. Düzdü, çatışmazlıqların olmadığını demirəm. Kiçik problemlər var ki, onlar da tezliklə aradan qaldırılacaq. Guya yeni tikilən evə köçəndə hər şey mükəmməl olur? Mütləq bəzi yerlərə “əl gəzdirməli” olursan. Turniketlər gəlib və yaxın vaxtlarda quraşdırılacaq. Ümumiyyətlə, bütün işlər layihə üzrə aparılıb. Stadionda oyun keçirmək mümkündü. Təmtəraqlı açılış mərasiminin niyə olmadığını soruşanlar var. Çünki buna ehtiyac yoxdu. Cənab prezident İlham Əliyev bir də onun üçün gələsi deyil ki... Gəldi və bir neçə müəssisənin açılışında iştirak etdi ki, stadion da buna daxildi”.
Nadir bəy areanın “Sumqayıt”a verilməsi yolunda İcra Hakimiyyəti tərəfindən yaradılan problemlərə də münasibət bildirdi:
“Elə şey yoxdu. “Sumqayıt”dan başqa kimə verilməlidi ki? Klub sabah avrokuboklara vəsiqə qazansa, Masazırda oynayası deyil ki... Bildiyimə görə, danışıqlar gedir. İnşallah, tərəflər tezliklə anlaşacaq. Biz “Sumqayıt”ın ev oyunlarını burda keçirməsinin əleyhinə deyilik. Maksimum istəyirik ki, kluba kömək edək. Yalan informasiyalarla futbolumuzun inkişafı üçün çalışan şəxsləri və görülən işləri pisləmək düzgün deyil. Klub rəhbərliyi ilə bütün detalları müzakirə edib ortaq nöqtəyə gələcəyimizə inanırıq”.
Stadion direktorunun fikirləriylə də tanış olduq. İndi “Sumqayıt”ın bu arenada çıxış edib-etməyəcəyini görmək üçün bir müddət gözləməliyik. İddiaların nə dərəcədə doğru olduğu isə PFL idman qurğusuna baxış keçirəndən sonra aydın olacaq. Hələ ki şəhər İcra Hakimiyyətinin klubla hansı şərtlərlə anlaşacağı daha vacib məqamdı.
KƏNAN BAHADIR
Digər xəbərlər
