Dünən AFFA İntizam Komitəsinin növbəti iclası keçirildi. Budəfəki qərarlar 2-ci liqanın 7-ci turunu əhatə etdi.

"Football-plus.az" xəbər verir ki, “Şəmkir” – “Sheki City” oyununda ev sahiblərinin azarkeşləri hakimlərin ünvanına kütləvi şəkildə qeyri-etik ifadələr işlədib. Bu hal cari mövsümdə ilk dəfə yaşandığından şəmkirlilərə xəbərdarlıq edilib. Qonaqların qapıçısının formasında qüsurlar aşkarlanıb. Matç bu üzdən gec başladığına görə klub 80 manat cərimələnib. “Kürmük Qax” – “Şəfa” görüşü bitəndən sonra Qax təmsilçisinin direktoru Əlövsət Bayramov hakimlər otağına icazəsiz daxil olub və oyunun rəsmi şəxslərinin ünvanına qeyri-etik ifadələr səsləndirib. Hadisə klub rəsmisinin 5 oyun cəzalanması və “Kürmük Qax”ın 400 manat ziyana düşməsi ilə nəticələnib. Bununla yanaşı, komanda PFL Əsasnaməsinin tələbləri pozduğundan daha 50 manat ödəməlidi.

“Füzuli” – “Baku Sportinq” matçında ev sahiblərinin 4 futbolçusu sarı vərəqə alıb. Oyunçuların intizamsızlığı bölgə təmsilçisini 70 manat ziyana salıb. “Dinamo”nu qəbul etdiyi qarşılaşmada “Göygöl”ün heyətində Fərid Məmmədovun çıxış etməsi İntizam Komitəsi tərəfindən ətraflı araşdırılıb. Qurum “transfer pəncərəsi”nin sentyabrın 30-da bağlandığını, klubun futbolçunun azadedilmə sənədini qarşı tərəfdən aldığını və mövsümboyu 3 klubda sifariş edilib ikisində oynaya bildiyini, həmçinin 2-ci liqanın yarımhəvəskar turnir olduğunu nəzərə alaraq, “Göygöl”ə hansısa sanksiya tətbiq etməyib.

Beləliklə, klublar bu iclasda ümumilikdə 600 manat cərimələnib. Nəticədə mövsümün əvvəlindən bəri intizam sanksiyaları üzrə nəzərdə tutulan məbləğ 84350 manata çatıb.

KƏNAN BAHADIR